"On," kuanen Isaganin imis to ngolay ampaipait; "sikami mangigapo, ta lapod walad dapat mi kairapan! Amta yon petepeteg no antoy sabiey sakey ya estudiante ya topaen toy sakey a profesor; sikayon dildili, anta ontan lay aro yod kaptekan, tan ontan lay abig tan suri ray liknaan yo, mapalaloy irap yon mamupukpok ed inkasikayo ed pakakangal yod idadalatdat ko ran ampaipait iran katuaan. Sikayo lan dildili, Padre Fernandez! Anto bilang so nalan kaabigan na siopa man ed sikamin tinmalek ya angittanem na bálo ran kanunotan? Tan nabilang yo ta ni asagsagmak yo ran kaugsan manlapod abig na ugáli yo tan pilalek yon manumpal na nabebetangan yo?"1
"Sinyor Isagani," kuanen dominiko ya inderew so lima to; "anggaman singa anggapoy asumpalan to nian impantungtong tayo, walan siansiay nalan kaabigan; untengen kod saray agágik a papári so amin day imbábaga yod siak, tan mailaloak ya walan. siansiay kaabigan a nagawaan. Say kapagpagaan ko labat so ag ira manisian walay estudianten singa panagnunot tan liknaan yo....
"Sikatotan met so kapagpagaan ko," kuanen Isagani ya pinasamano toy malmalet si dominiko; "mapaga ak a saray kakaarok et ag ira met manisia ya walay sakey a párin dominiko ya singa sikayo, unong na impakatalus kod sikayo ed impangilukas yoy pagew yod siak natan."
Tan lapod impasen ton asumpal lay tungtongan da, nanpatanir tan imanla.
Si pári Fernandez a díli so angilukas na pinto, tan pinakpaknuyotan toy matá anggad inlikó ton agtola nanengneng. Abayag to nin tinalineng iray kurang to, insanla linmoob, tan tinalaranan to lamet ed dorongawan so imbutay tod lansangan. Anengneng ton tua, tan nangel toy inebat tod sakey ed saray kaiba to ya anepet no iner so laen to:
"Diad Gobierno Civil! Nengnengen ko ratay paspaskin. tan midamay ak ed saray wadman!"
_____________________
1 Singa impasingayew nen Rizal diay nagagawad sikaton dili ... saray irirap ya asagsagmak to ed pilalek tan pilit ton mangipaseksek ed uló ray kabaleyan to na panamabli ed dilin kagalangan. Sayan tungtongan na sakey a párin dominiko tan sakey ya istudiantin pilipino, ag nasisian agawa ta ontan lay tagey na linawa ray papárin ampoti ya agdan balot abuloyay siopaman a Isaganin mangiparungtal ed lupa ray katuaan, balet ta ginawa nen Rizal ta pian nasupiat toray ikakatonungan day papári. Say impamabrika nen Rizal ed pári Fernandez sakey a pakapatnagan a maong a loob, ta impasen ton nayari ya walay sakey a párin dominiko ya propisor ya nayarian toy onabuloy a misupiatan ya anggapoy sanesaneb na linawa, ed sakey ya indio.
