Singa pinúyanan si Ben Zayb ed panesekder tod linmabas iran agew ed ikukurang ton palapagan a say áral makapauges, sankamakapaugesan la ed Kapoloay Pilipinas; natan nisengeg ed saray agawagawa ed saman a viernes nipaakar ed saramay paspaskin, si sumusulat apabaleg ton maong so inkasikato ya manpapangta, ed baleg a kababaingan nen katagam ton Horatius, ya apamelag ton maong so inkasikato balet, ed intalek ton manmurmurad Ben Zayb diad impansulat tod palapagan a Pirotecnia na onia:
Walayan nabasa ed palapagan ya El Grito:
"Saray aral makapauges, sankamakapauges la ed Kapoloay Pilipinas."
Amta lay makasengeg ed saya.
Andukey lan agew a say palapagan ya El Grito et isip ton ilalaman toy lapag a bansan pilipino; ergo1...kuan komon nen pári Ibañez no amta to labat so latin.
Balet ta no mansusulat si pári Ibañez manmaliw a panagnunot na musulman, tan kabat tayo lan peteg so pangipapasenan day musulman ed aral.
Tasi ed saya, unong na kuay sakey a nababantog a managsirmon, say library ed siudad na Alejandria!
Natan, atalusan dan siansia ya wala manayay katonungan. to,— sikato ya Ben Zayb! Susto sirin ya sikato lambengat so mannonunot diad Pilipinas tan bukor toy makaparles ed onsabi ran nagawa!
Say katuaan so say binmawag a balitan walaray nalmon paspaskin ya sungpad Uley ya impepeket ed pintoy Universidad. aliwa labat lan inekal toy ganas dan mangay dakdakel a totoo.
________________
1 Ergo — No ontan sirin.
