Si Simoun balet agto labay so minengneng ed anggan siopa, tan impaibaga to labat ed kinen intsik Quiroga ya paulian ton anggapoy gagalawen to, tan nisengeg ed saya tinuloy nen intsik si Don Custodio ya ipanon no kasi ta nakaukolan a pabantayan toy basar toy totoo ran nan armas, et si Don Custodio agmet napisalitaan, ta peles ton aaralen so sakey a kanunotan a pangilaban to met ed inkasikaton dili no bilang ta liktobey kabusol. Anunotan nen intsik ya imbales a nilay Ben Zayb a pitepetay balbalita, et nen asabí ton pigapigay paltog to ya pati inpanetdet tod saray papil ed lamisaan to et duaran paltog a napnoy bála. nanpatanir lan tamtampol, nankapot ed abong to, insan to indokol a baraan toy mauges so laman to.
A las cuatro ed saman a ngarem aliwa labat lan paspaskin so kukutengtengen day totoo.....nansangá, nanbonga la. Walala ray mangiecsaes a mitatalusan iray estudiante ed saray tutulisan a manaamotamot ed palandey na San Mateo; walara met so mangipasout a singa togtúa ya diad sakey a pansiteria et wala ray nannonunong a sinambaan dan biglaan a loobay siudad; wala ni ray angibaga ya wala ray barkon alemán ed paway na doroongan a sipaparaan ya ontulong ed gagalay sakey a togiop day tubonbalo ya baraan day nalalanor ira tan labay dan ipatnag so panangaro tan panangiansakit dad España et linma rad Malakañang a konwarin mangisaklang na inkasikara ed Sankatageyan a Kapitan General, et inerel da ra balet ya impangaw nen asukayan a walay armas da. Inlabay tawen si Sankatageyan a Kapitan General ya agtora akapisalitaan iraman a masilib a mauges a totoo, ta peles ton mimiungteng ed saray makauley da ray nanduruman togiop day papári, si Vice Rector tan si pári Irene ya imbaki nen pári Salví. Baleg so katúaan da ra nian dengeldengel no sisiaen si pári Irene, ya ngarem ton man ya agew et nila ton dinalaw si Kápitan Tiago. Unong ed sikato, walaray totoon manisimbawad kinen Sankatageyan a Kapitan General ya maong a samboten to yan inkagawa ya pamagiaw to pian makaaral iran naderiay amin a filibusteros.
"Say pamapaltog na pigaran katao," kuay sakey, "say pangerel tan pangipaalis ed kaitlekay lábi na duaran dosina bilang ed saray nababalitan malabay a mamasimbaloy onkukurang ya uley, sebseban da lan anggad anggay amin ya asewek ed uló da ran tay agda napapaknaay bilay da!"
