"Aleg," kuan met na sakey a mapangasi; "masarag lay panliber day tropa ed kalansanganan, sakey bilang a batalyon a dikabayoan, ya inuyos so kampilan da; masarag lay pangigayogoy a pangiliber na pigaran kanyon.....masarasarag la tan! Matakut met so báley et, amin a tood satan onsupok larad kaabongan da."
"Andi, andi!" kuan met na sananey ya impasingayew; "okasion layan panemek ed saray kabusol; kulang itay onsupok ira labat ed kaabongan da; say maong ingen papawayen ira ya singa panagsupsop na impalkap a sinapismo ed mauges iran tabol na laman. No ag ira ontalek ya onalsa, nakaukolan a pasebegen ira na totoo ran managsugsog.....No diad panagnunot ko labat, nakaukolan ya onekem iray sondalo, ipatnag so singa anggapo labat so wala, ta piano onsebeg ira, insan diad bengabengat lad tan a guló talikebkeban iran andi panangasi!"
"Say darápaten itdan toy katonungay antoman ya ikana ed pakagamor," kuan lamet na sananey; "say darápaten tayo say pagnayon na masantos a religión, tan say galang tan nagnap a kaabigay Inan Bansá. Liktobey siudad na tropa insan diad bengabengat lad tan a guló, erelen ya amin iray mayaman tan atagey ya aral insan.....línisay bansá!"
"Maong ingen ta akasabiak ya abaat ko ra tan asimbawak iran maong lawas so mandanka," kunen pári Irenen intuloy ya inmarap ed Kápitan Tiago; "no andi, managos la komoy dala ed kalansanganan. Sikayoy nonunoten nonunoten ko, Kápitan....Say togiop day masesebeg a mapasang anggapoy agawaan dad kinen Kapitan General, tan anapen day Simoun.... Ah, maong ingen ta agmakayari Simoun....."
Diad inkisegawan nen Kápitan Tiago ed inkipangaw nen Basilio tan say impanouna ray guardia na amin day liblibro tan papipapil to nia, aliwan dagdaiset so dinendenay sakit to. Insan lamet natan lolouren nen pári Irene pága to ya totungtongay makapabegas iray bagón balbalita. Sinmabid sikatoy ag nibalikas a takut, ginapoan toy manggiwgiw a pinmalalo lan pinmalalon asabin agto makasalita ed gaway pantayegteg to. Manmoldag iray matá to, naames na linget so muling to, sininkat ton pineketay taklay nen pári Irene ya ipapasout toy ombangon, balet ta agto ayarian, tan nipasag a biglad mad danganan ton bansag na insanggouk ton amidua. Akamulagat, managos so ilo to, tan tampol a nauyos so linawa to. Diad inkataktakut
