Saman a lábi saray guardia ed pintoy siudad, sinandian iray artilleros peninsulares1 tan diad kaimbuasan ed katayagtag na agew, si Ben Zayb ta apakpel toy linawa ton amasiar a pannengnengan toy elet day makakapal iran padir a nanliktob ed siudad, arumog tod man ed alosarsar na padir ed asingger ed Luneta so bangkay a midio lakseb na manmarmarikit ya india yal pinaulian dan intilak diman. Akebiew si Ben Zayb tan kayari ton diniwit na bastón to tan linmingaw dimad pinto, intuloy toy panaakar to, tan ninunot toy mansulat na sakey a tungtong na aroan nipaakar ed saman a bangkay. Ontan man ag balot akalamit iman a bangkay ed saray palapagan ed ontumbok iran agew a say asalsalita da nia labat saray totoon atumtumba tan akarkaronias ed impakagagatin da ed ukis na ponti, tan manlapod anggapo lay nanunotan dan balita, si dílin Ben Zayb apilitan a nansulat na andukedukey nipaakar ed sakey a mabiskeg a bagyon dinmalan ed América ya nanderal na akamayamay iran balbáley tan akasengeg na inateyay masulok a duan libon totoo. Nilalaborlaboran toy onia ra:
"Say panangasi ya lawas lalon mabilay ed báley iran katóliko nen iner man, tan say pannodnunotan ed samay Dios a tinmoo ya diad panangasi tod talbay katcowan et imbagat toy Inkasikaton impapatey, pasibegen da itayon mangasi ed segsegang day kapara tiran totoo, tan makasengeg na panggawa tayo komoy maabig iran sipan ed Dios tan saray sasantos, pian diad sayan bansan mabetbet a napapairap na bagyó et anggapo ray nagawan makapaermen a singa say pinalabas dan naimatonan na manaayam ed Estados Unidos!"
Si katagam ton Horatius agto ya pinalabas, ya agto met sinalitay ni inaatey, ni samay pangaskasian a manmarmarikit ya indian pinatey, ni saray impakapairap ya impakapaunong, no agta inebatan to labat ed palapagan a Pirotecnia na onia:
"Diad ontan lan sinalita ton panangasi tan pananayakop ed talbay katoowan, si Fray Bañez, ay.....say labay kon ibaga. si Ben Zayb, anganggaay amta ton gawaen so pikasi toy Pilipinas.
"Et agya nepeg a pankelawan, ta sikato aliwan katóliko tan say panangasi lawas lalon mabilay ed, etc., etc."
___________________
1 Sondalo ran kastilan inanak ed España ya maong irad panangikanay antoman ya armas.
