Maong so asumpalan nen Kapitan Tiago, ya kabaliksan to niay, matálag so akapiparad punpon to. Tua ta say kúrad saman a parroquia tinawag toy imano nen pári Irene ya si Kápitan Tiago inatey ya ag nankonpisal, balet ta sayan sankarunongan a pári, ya manimimis na napnoy balaw, pinorapor to ngola may tepek na eleng ton akimandukey tan kuanton inmebat:
"Anto konoy wala ey? No isebel tayoy pangitubong ed simbaan tan agti yabuloy so makanan punpon ed amin a ompatey ya ag nankonpisal, nalingoanan ti lay De profundis.1 Amta yon peteg a saratan ya alablabas ya elet nayari ran tumboken no say inatey ya ag nankonpisal et agmet makabayar.... Balet ta no nipaakar ed kápitan Tiago!.... Labat pa la! Impopunpon yo ray intsik a bugkalot ya ag manisiad Dios, ya inmimisa yo ni ran dinasalay requiem!"
Si Kapitan Tiago tinoró toy pári Irene ya manumpal na Jugay testamento to tan impatawir to ran inaapagapag so bienes to ed Santa Clara, diad Papa, diad Arzobispo tan saray togiop day papári, tan angitilak met na duamploy pisos ya itulong ton matrikula ray manaaral a mairap. Sayay unor impanunot nen pári Irene ya impaisulat ta ompapasen lantin mananulong ed saray tubonbalon maliket a manaral. Impaekal nen Kápitan Tiagoy impatawir to la warin duamplo tan limay pisos ed kinen Basilio, manlapod impasen ton kalamangan to nia nen kaunoran iran agew, et impawil nen pári Irene balet tan imbagá ton sikato lay mangiter a manlapo lad bolsa tan konsiensia ton díli.
Dimad abong nen inatey a nandarágopan dad kaimbuasan na gendat laran kabkabat tan kakaaro to, baleg a kutengteng so gagaween dad sakey ya agawan milagro. Kuanda ta diad samay bektan panpapanábos nen Kápitan Tiago, pinmayawar so
__________________
1 Dadasaley pári ed inatey.
