talbay pinalsa, ya pati si Basilion dili lemlemewen to! Andi.
andin balot! Ibitay to ni laman ton onona, odino ontaboy ed
kelás. Kaabigan, napaktak met lanlamang ed impiernos ta
mauges ya anak!
Inako to nin amin kalamor so tetetetel day kakanayon to, ya manlapod agda amtay labay a gamoran nen pári Camorra ed sikato, elekan day onman lan takut to. Akin naarap ni nen pári Camorran lingawey sakey a tagá úma ya anta akamayamay so mamarikit ed báley? Tan bitbitlaen day kangaranan day mamárikit a mangayaman a wala la ray agawgawa ra..... Bangbalet no paltogen da lay Don Basilio ey?
Manpepet na layag toy Julí, lingawlingaw ed biek tan biek a singa manaanap na onsalitan mangiagel ed sikato; nengnengen toy láki to, et saya emel a terteregan to labat so gayang ton pananganop.
Saman a lábi samsamet akaugip. Mantotumbokay kugip to ran makaleplep, walaray makapaermen, walaray makapataktakut, tan nabangonan tod satan a naames na ambetebetel a linget. Diad kugip to sankarengel toy mapalatupot a paltog, sankanengneng toy amá to kalamor ya onman lay impangaro tan impansagpot tod sikato, ya mitotulot dimad katakelan tan aanopen a singa ayep ta agto napanmatalkan ya ilaban. Kasanlilikna naumay itsura nen amá to ya manmaliw a Basilion manpapanabos a kanenengneng tod sikatoy napnoy turing. Nabalikwat ed satan, mandasal a mannangnangis, pibitla toy ina to, tawtawagen toy patey, tan asabisabi lay bektan diad kapoy to lad takut to, no ag labat lábi anganko, batik lan linmad konbinto ya anggan anto lad tay kisabian to.
Nen nanliwawa, singa abawasay daiset iramay maerermen ya onliliknad sikato, tan saramay pinasian takut to nen ambilunget. Nanilalo lamet ed impelnak na liwawa. Saman a ngarem balet makakebiew iray balitan apasabí to. Walaray sasali taen dan pinapaltog, tan makapataktakut lamet so impamalabas toy lábi. Diad inkaandian to lay ilalo, niluto to lad linawa ton iter lay inkasikato no kabutay na agew, insan la manbitkel; anggano anto lad tan, dapot agla mamalabas na sanlábi lamet ya onman!
