Balet ta diad intayagtag na agew, nanlínak lamet na daiset so uló to tan nanilalo lamet, ag inmakseb, ni linmad simbaan, ta mapagan napaktak ya onabuloy.
Pigay agew so linmabas ya onia; no ag mandárasal, mangisasamba, pitawag toy Dios odino say patey. Makainaway daiset no manliwawa la, tan siaalagar na nagawan milagro. Unong na balbalitan manlálapo rad Ibále, ya anggad pakasabí rad barrio et nansanga laran nanbulong, nablos laray arum ya estudianten nipangaw lapod walaray anulong ed sikara tan maong so peket day boleg da..... Nakaukolan a walay sakey a nadusan nipanengneng a panmarmaran day totoo..... siopa balet kasi? Nakebiew si Juli ed pakangel to ra nia, tan ompawil lad satan ed abong a manketket ed kukoy gamegamet to, tan onman ton sabiey lábi ya manpalalod satan so takutakut tora, ya manmaliw laran singa togtúa. Asabí lan antakut ya unogip ta anggapoy tonday kugip to ran makapataktakut a makaleplep. Kalikdem to singa tatalusen iray lukablukab toy limgis iran nantarok na túring tan singa bubulibulen iray layag toy ingel tan tagleey. Sankanengneng ton malinlinew iray balor nen Basilion binmibiret a sinugat day laman to, sankanengneng toy dalán ompapaway ed sangi to, tan sankarengel toy mangganalgal a bosis ton mantawag ed sikaton mankuan: "Ilaban moak, ilaban moak! Bukbukor moy makapangilaban ed siak!" Insantod satan narengel so nalaldak ya elek, onlingaw tan nanengneng toy ama ton limlimgisen ton napnoy turing. Naliing ed satay Julí, ombalikwat ya aplosen toy muling ton paninop toy buck to, tan nakarapas ton manlinglinget na ambetebetel a singa linget na patey.
"Ina! Ina!" kuanton mansibsibek.
Legan to nia, sara balet so mangikukurang a malikeliket, ya anggapoy walawalad sikara, ed bilay day kabalbaleyan, say mangigaganggan na pamatey ya aabuloyay totuntonen iran ganggan, say manusumlang ed kaptekan tan mangikakanay pankatonungan a panekder tod biskeg, balibali ugip da.
Walan siansiay akasabin nanlapod Ibále ya nanawit na balitan nablos laran ami estudianten nipangaw, likor labat si Basilio ta anggapoy manúlong ed sikato. Say dengel ed Ibále, kuanton may sinmabí so ipaális day Basiliod Carolinas ta impanpirma da lay sakey a sulat a konwarin nanlapod linawa ton dílin
