Kasabí ra balet ed pintoy konbinto agto lan balot napasegep si Julí ya impeket to nia ed padir.
"Agko, agko!" kuanton mikakásin mapalaloy takut; "ay andi, andí, panangasi yo!....."
"Ay, ambagel ka saló....."
Itutulak nen hermana Balí ya kakalkalnaan; agton pilit nen Julí, amespesiaw ya nagbay lupa to. Manligab iray matá ton singa sankanengneng tod arap toy dílin patey.
"Eh, ompawil itala sirin no agka!" kuanen hermana Balin mauges lay uló to, ta diad katuaan anggapoy átap na linawa to. Anggan anto ni uges nen pári Camorra, agmet ontalek a manggaway aliwad arap to.
"Ipaalis da lad tan sirin si pangaskasíyan a Don Basilio, paltogen da lad tan ed dalan ya ibaraan dan ombabatik!" kuanto nin intuloy; "naani no inatey la insan onsabid satay babawi. No siak ingen, anggapod tay utang kon linawad sikato. Agtoak ditan natetel!"
Sikato la may akapatulok ed Julí. Kangel tod saman a turing, diad irap na linawa to tan inkaandian to lay ilalo, ya singa sakey a toon manbitkel, inlikdem to pian agto nanengneng so tabuyan ton kelás, tan masulong a tinmobong ed konbinto. Nginmesway balbaleg ya aliling na ingas na manpapanábos.....Tomtumboken nen hermana Balí ya bibilinen.....
Diad lábi ton man omesaes iray totoon mangukutengteng a maamoamot na agawgawad saman a ngarem.
Walay marikit a tinmaboy ed dorongaway konbinto, nipatad kabatoan tan inatey. Kabansag to niay sakey met a biin masigsiglat a pinmaway ed pinto ya batikbátik ed kalansanganan a maningal tan maneyag a singa ambagel. Saramay mapasakbay lawas a mibabáley antakut iran manbitlay ngaran, tan dakel iray kainaan a kinakarut da ray ának dan bibii ed impakapangibulos da ra niay salsalitan nayarin makalanor.
Diad abaybayag ed saya, nen mansilunget la, nitan lay sakey a masiken a nanlapod sakey a barrio, tan abayag a mantuktok ed pintoy konbinton akakaput tan babantayan day sakristan. Samay masiken pinapalpal to may pintoy sanduan poniti to, binabanggá toy uló to, managlem na mangganalgal ya ag natalusan a singa kakaingal na emel, anggad agda inablog ya intutolak tan sinosunsoy pekpek. Linmad abong nen Kápitan et imbaga rad sikaton andidman ta walad konbinto; nila toy Juez
