"Kasi met lay pári Camorra a!" kuanen Ben Zayb warin masibsibeg; "masaysayaksak nimet insan maong a loob!"
Tuay dengel ya saramay estudianten nipangaw et nablos lara lapod andi tondan impankimey tan impankerew day kakanayon da ya anggapoy impuksil dan gastos, rigalo may sagsagpot. Say akagkaonan akapaway unong na nayari lan parlesan, si Makaraig tan say sankaonoran si Isagani ta nen makasabi pári Florentinod Ibale sakey simba lay linmabas nanlapod impaway dan may paspaskin. Say onmanlan panangasin impatnag nen Kapitan General, akalaan toy balbaleg a dayew ya anawagan clad sikatoy maabagey tan mapangasi, ya pananawag irayan impanó nen Ben Zayb ya andi abála ed andukedukey lan listay mararakep iran salsalitan gendat lan pananawag da rad sikato. Bukbukor nen pakaskasin Basilio kalamor so atilak ya ag nablós, ta niarum lamet a dalem ed sikatoy pangiaatol toy libro ran sebel a básaen. Ag amta no say labay dan ibaga et samay libroy Medicina Legal y Toxicologia ya gawá nen Dr. Mata, odino saramay ankelag a mapmaimpis iran liblibron nalmorad saray kagawaan to ya nipaakar ed Pilipinas, odino sarayan dua; say asumpalan to so ibabaga ra met a isisikotsikot toy manlalakoy libro ran sebél tan sikato kalamor so adetdetan a naplagay amin a belat na dusá.
Say dengel so onia ray imbagá rad kinen Kapitan General:
"Nakaukolan a walay sakey ta piano nasanibay galang na pakauley tan ag nibagan onman lay gulón ginawa tayo insan anggapo lan lamang so asumpalan to. Say pakauley so nepeg a nunoten. Nakaukolan a walay natilak!"
"Saksakey lay atilak, sakey ya, unong na kuanen pári Irene, et, ugaw nen Kápitan Tiago nen saman..... Anggapoy mansasakit na ulon mangipaway ed sikato....."
"Igaganggan tan estudiante?" kuay tepet nen Kapitan General; "satan sirin, sikato tay itilak!"
"Abuloyan yoak pa, Sankatageyan a Kapitan General." kuanton may atagey a betang ya empliado ta nibanan wadman ya akaarap; "kuandad siak ta satan a tubonbalo manaaral na Medicina, idadáyew da ray profesor to, tan no magnayon ed pangawan naabalan sakey taon, ta sayan taon so pansumpal to....."
