"Anggapoy walad satan, Sankatageyan a General ko, anggapoy walad satan! Aliwan saray pilipinoy anurod sikayo no ag say dílin España, kanian masulosulok la komon a makasengeg ed pantrato yon maong ed saray pilipinos ta piano anggapoy nituring dad España! Masulosulok yan makasengeg, Sankatageyan a General ko! Diad inakar yo dia kabaliksan toy impangisipan yoy panuley yon napnoy kaptekan, pananap yoy kaabigan.....
"Agko sirin itan gagaween?" kuay tepet nen Sankatageyan a Kapitan General, ya agto apasumpal tan pinasiay inalipánes to ya akakondang a sinmingger; "agko la ayarin imbagad sikayo ya diad kaabigay sakey aleen koy kaabigay karaklan? Labay yoak sirin a ibangat? No agyo natalusan iray gagaween ko, antoy kasalanan ko ey? Papasouten ta kayo tan misakbat ed saray eebátan ko?"
"Tua ta andi!" kuay ebat nen atagey a betang ya empliadon nanpetek a nengneng toy ag mangitaltalek; "agyoak papasouten, Sankatageyan a General, ta agyoak man napasout, siak aya, ya pibabalien ed saray cebátan yo! Dumad panangisip yoy pakatalus kod dilik iran eebátan, tan manlapod kabat kon peteg so cebátan ko ra, onmatalek ak a mansalita natan ta andukey man lan agew a popukpokan koy inkasiak ya agak inmesel. Ah, agyoak kukulisengan, Sankatageyan a General, ta say inakar kod dia ya manumpal na saya ono saman a kimey, agto kabaliksay isukok iray pankatonungan ko tan panmaliw kon aliling na aripen a sinaliw ya andin bosis tan galang! Ansakit kon tuloy a say España et naikbanan to yan marakep a bansa, tan say walon laksan totoon ouleyan to dian matulok ira tan maanos, ya manbibilay ira kalamor ya andi ilalo; balet ta ontan met so agko panlabay a pandutak na limak a mibiang ed andi panangasin kapepespes to nian bansa tan saray totoo to, tan agko labay a nibágan anggan kapigan ya, anta abagbag lan apaandí so panangaripen a sinaliw et itutuloy ni Españan andi dangká, ya sasakoban toy laylay to tan papaabigen ton pabobolaslasen a sasaniban na makatawag na imano rad karakpan a panagaralan, tan togiop iran konwarin andi arum a tatakpanen da no ag say kaabigay bansa. Andi, diad kitandoroy España agto nakaukolan so manduksa; say España anggapoy arum a nakaukolan to, nagnap lad inkasikaton dili, say España lalon nitandorod katagtageyan nen dálin ton díli labat so walan kayamanan to, ya
