noumameg na araldalem. Nanlapod impansakit to lalon singa
masebesebeg ya ambilbilunget so lupa to, tan nanmaliw ya araldalem imay piligis ed nanlaetay kirep to. Singa nengneng toy
binmukot; aliwa lan makmaktek so uló ton singa unong a
gendat,.....mabetbet a tewek. Ontan lay kaaralem na panoumameng to ya agto nangel so mantuktok ed pinto. Akaukolan ya apapidua to may tuktok. Akigtot ed satan tan:
"Loob kayo!" kuanto.
Si Basilio, balet ta quantum mutatus!1 No baleg so naumanay itsura nen Simoun ed duay bulan a linmabas, say inkauman Basilio makapataktakut. Nikukondalem iray aping to. akulkolastay, akeskes a marindingot so kawes to, tan agulgol so buck to. Anggapo la may matamtamoy a kaermenan ya nanenengneng ed mata to; natan singa ra mandarlang ya ambilbilunget; nayarin ibagan inatey, insan inmolin binmilay so bangkay to ya atakut ed anengneng tod bilay a sakey. No aliwan say dílin kasalanan, say makakebiew ya anino to nia so mapatpatnag ed nengneng to. Si dílin Simoun nisegawan tan naplag so panangasi tod saman a masegsegang.
Ag angigalang si Basilio; matantantan a sinmingger tan diad bosis to ya akigtot si alajeron akangel, inkuanto:
"Sinyor Simoun, mauges ak ya anak tan mauges ak met ya agí; inlingoan koy impamatey dad sayay onor tan say impanpairap dad samay akaona, tan dinusá ak na Dios! Natan. apasakey so walad linawak, say pangibales koy mauges ed kaugsan, kasalanan ed kasalanan, tan say biskeg ed impangikanay biskeg!"
Andi esel nen Simoun ya onderengel.
"Apat bulan la anganko natan," kuanen Basilion intuloy; "ya sinalita yod siak iray kanunotan yo; agak ginmanpid sikayo, tan alingoak; walay katonungan yo. Taloy bulan tan kapaldua lay linmabas ed interak la wari rebolusion, ontan met ya agko ginabay so mibíyang tan naapa man a kanunotan. Say naawat kon tumang ed onian ginawak say impangipangaw dad siak ya bukor na tulong yoy akautangan koy linawa ed inkablos ko. Birbiren kon walay katonungan yo, tan linmaak dia natan ya mangikuan: itdan yoak na armas ta labay kon onterak so rebolusion! Sipaparaanak ya mangonor na iganggan yo ya katekep ko ray amin a masegsegang!"
___________________
1 Agay lay inkauman to!
