apasimbalo tan kinawesan ya singa panpunsiaan; say bansal nen
Juanito Pelaez! Saman a ngarem walay asalita nen Simoun a
punsia.
Diad saya linmabas ed arap toy andukerukey a mantotumbokan iran luganan ya napno ray lalaki tan bibiin mantotungtong a masaysayaksak; singa apasikmatan tod dalem day ankakabaleg iran sinisipol a rosrosas et agto ra inimano. Saramay luganan mamapaarap irad lansangay Rosario tan, manlapod misasabatan irad saray luganan met ya manpapalusor ed taytay na España¹ mabetbet iran makatonda tan matantantay kurang da. Diad sakey ed sikara anengneng toy Juanito Pelaez ed abay na sakey a biin nankawes na ampotí tan nanpandong na ampotí met a mapmaimpis, tan abirbir ton si Paulita Gomez.
"Si Paulita!" kuanton nikelawan.
Tan manlapod anengneng ton sikaton tua ya nansulong na kawes na mankasal tan iba toy Juanito Pelaez ya singa kagkapanlapo rad simbaan,
"Kasi met lay Isagani!" kuanton makalkalna; "anto la kasi asumpalan to?"
Sankanunot ton aganoy kaaro to, toon maong a ugali, maabagey tan mapangasi, tan tinepet tod inkasikaton dili no ag kasi maong ya salitaen tod sikatoy gagalan gaween, balet ta inebatan to lan lamang so tepet ton dili ya si Isagani ag balot onabuloy a mibiang cd onman a itsuray panagpatey.... Sakey ni ag agawgawad Isagani ray ginagawa rad sikato.
Insan tod satan anunotan ya no ag komon nipangaw saraman a bekta araparapen to met lay mankasal odino nankasal la, doktor la komon tan manaayam la lágin mantatambal ed sakey a sukong ed lúyag to. Sinmebang cd nunot toy anino nen Julí ya adanel tan binmetag so uló tod intaboy tod bintana; dinmalang iran binmalangay matá tod layap na pankabusol, tan inapaplos to lamet imay putay paltog, a mairap so linawa tod agni asabí makapataktakut ya oras. Diad saya anengneng toy Simoun ya pinmaway ed pintoy abong ton awit to may kajoy lamparaan ya inapipiger a binalkot, tan sinmapat ed sakey a luganan a tinmunbok met yad saramay nantataluntonan iran luganan ya angulop ed saramay kapankasal. Si Basilio pian agto nabalangay matay Simoun inimano ton maong imay kotsiro
___________________
1 Jones Bridge so ngaran to natan.
