tan baleg so inkikelawan to nen abirbir ton saman imay masegsegang ya angitulor cd sikatod San Diego, si Sinong ya binakbak na Guardia Civil tan mangipapasabid sikatoy amin a nagagawad Tiani nen dadalawen tod pangawan.
Nen anginap a diad lansangay Anloague so gapoay gelew, diman met amaarap ya sinigsiglatan toy akar to tan inonaan to ni ra may luganan. Mamapaarap iran amin a tua ed gendat ya abong nen Kapitan Tiago: diman ira mandaragop ya ondagod sayawan, agda amta balet ya onsayaw irad dagem! Akalek si Basilio nen anengneng to ray nanpaparis a Guardia Veterana ya liberliber a manbabantay. Diad karakel da napar.esan lay kinabalgan tan inkamakabaliksan na pista tan saray binagaan. Ascksek na tooy abong tan manlangalang iray silew ya nawawandagay anggad paway daray dorongawan. Say alpombra manlapo lad katubong ed pinto tan nimakmak so rosrosas. Diad tagey, diman pa lágid kabukbukoran a silir ton gendat, manotugtog natay orkista na masaysayaksak iran sonata, ya agda man natatabonan ya aminpinsan so nankakames a tanol na elek, salitaan tan mankilaldak iran arakak.
Si Don Timoteo Pelaez arapat ton siansiay pantok na kapaiaran a say katuaan apalakbatan toni ray kugkugip to. Apaasawa ton siansiad anak toy sankayamanan a tomatawir day Gomez, tan diad impamautang nen Simoun ed sikato apaapiger tan akawesan ton onnepeg ed dílin ari man ya abong a baleg, ya amuraan ton asaliw na kapaldua lambengat na suston bili to, ya pangiiteran to natay marakep tan malagay a punsia ya sankaili to ray manonaan iran dioses na Olimpo ed Manila,1 ya sikaray makapangitandorod sikato ed manlangalang a katagiay kipapasen da. Andi tondan onsesebang ed uló to ya singa betbet na pakangel ed sakey a kanta bilang a kabawbawagan ton bongay sangi ray totoo so salsalitan abasbasa to kasakbayay impangaako toy láman: "Asabilay oras a maliga! Manasingger lay bektan maliket! Maganó la ran nasumpal ed sikay marakep iran balikás nen Simoun ya: Manbibilay ak, balet ta aliwan siak no ag say Kapitan General so manbibilay ed siak, etc." Si Kapitan General so anganak ed kasal ed anak to! Tua ta andid man ed akton kasal ta inlamanan nen Don Custodio,
____________________
1 Unong ed pananisia ray totood Grecia nen inmonan panaon, say ayaman da ray gagalangen da ran dios da diad palandey na Olimpo; kanian say labay ya ibaga dia sirin so amin iray mamayaman tan atagey ya inkatoo ed Ibale,
