Nangel iray nanbabanlangan a pasiot tan palakapak na salí ray kabayo,—sinmabí lan siansia!
"Si General!—Si Kapitan General!"
Pinmesiaw so lupa nen Don Timoteo, inmalagey ya intepel ton dinisimula kalamor so sakit day bukling to, insan inmakseb a kaulop toy anak to tan arum niran atagey a dioses a mamarawes ed Magnum Jovem1. Abalang so sakit na balambang tod duarua ran sinmebang ed ulo to: manepeg kasin onimis odino manpabinta? Yawat to kasi lima to ono alagden ton ononan mangiderew na lima toy General? Abagay la! No panon met so impakalingoan ton anepet ed kaaro ton Simoun no antoy manepeg a gaween ed sarayan kipapasen! Diad pananib toy paga to tinepet tod anak ton makalkalna ya bosis toy giwgiwan;
"Angiparaan kay diskursom?"
"Aliwa lan moday diskurso, papá, lalo la no onia ran okasion."
Sinmabí Jupiter2 ya kaulop toy Juno³ ya nengneng to niay singa sakey a kastillon napnoy koitis: mankidiam iray brillanted buek to, diad beklew to, dia rad taklay to, diad nantopag ya abalá, diad amin a pasen! Kawes toy mabmabli ya sutla ya andukerukey so dikola ton binobordaay rosas a pinapaalsa.
Nayarin tuan ibagan diníli nen Sankatageyan a General so abong ya unong na kinerew ya impikasi nen Don Timoteo ed ngalngalin ag makabesngaw a bosis to. Tinugtog na orkistay marchay ári, tan say mangaridios a pareja sinmegep iran napnoy kabintaan tan galang ed samay inalpombraan a takayan.
Say binbinta nen Sankatageyan a General aliwan konkonwari; ononaona pa lági man nanlapod insabí tod sarayan Kapoloan a nanaermenan; saray kaisipan to singa ra akubutay ermen. Kaunoran layan pamagalang dad sikato ed taloy taon ya impanuley to, tan diad loob na duay agew, benegan to lan taynan a maminpinsan iman ya atagey a betang. Diad onia, antoy sisipotan ton tataynan ey? Si Sankatageyan a General agto labay a lingawen so linmabas la, lablabay to lan ilimgis iray matá tod arapen! Tua ta baleg a kayamanan so awito tan
________________
- 1 Say sankamakapanyarian a Júpiter, a say labay ya ibaga si Kapitan General.
- 2 Died pananisia ray inmonan totoo ed Grecia, sikatoy Ama ray amin iray arum a dioses.
- 3 Diona ya asawa nen Jupiter.
