kasikato ed kaabigan day totoo ed baley a pankukuraan to, tan inarap to met so nanaral na ciencias naturales ta sikatoy inalakay linawa to.
Nen dinmalan iray agawgawa nen 72¹ pinmagay pári Florentino ya manlapod mabolaslas ono dakel so onloloob a kuarta ed báley a panku-kúraan to, et natawag so imano ed sikato, tan lapod sipor a toon maliket lawas ed bilay a mareen, kinerew toy yekal to, tan nanlapo lad saman manbíbilay a singa labat toon partikular dimad daldalin na boleg to ed gilig na dayat na Pacífico. Diman to tinagibi kaanakan ton Isagani, ya unong na kuanday malalabir et anak tod samay inaro to nen saman, nen saya et abaló; sara balet so mabintan totoo ya makapikabat na katuaan, kuanda ta anak ed aro na sakey a kapinsan ton bii ya manaayam ed Ibale.
Samay Kapitan na vapor anengneng toy pári Florentinod man ed leksab, tan pinasout ton onsegep dimad tagey ya impatumbok toy onia pian ag makasunggay:
"No agkayo onsegep, ibaga da ran may papárin ampoti ya agyo labay so milimog ed sikara."
Si pári Florentino anggapo lay nibaraan to, kanian impatawag toy kaanakan to pian amta to niay nagagawa, tan binilin to ya agto asinggeran legan ton wadman ed tagey.
"Ta no nanengneng ka nen Kapitan," kuanto, "pasouten to ka lamet ya onalis diman, et makababaing la."
"¡Panagnunot di tíok langola!" kuanen Isaganid kalakal to; "ta piano anggapoy makasengeg na pakapisalitaan kod kinen Donya Victorina!"
___________________
1 Saray impapatnag day liberal ono bulos a panagnunot diad Ibale, tan say inalsa ray Arsenal ed Cavite nen taon a 1872 ya akasengeg na inkatutolan day taloran papárin andeket a nilipit a sikaray angitalagaan nian libro; sikatoyay inmonaona ya lingo ray kakastila, ya sinmanpot ed impamatey dad Dr. Rizal tan akasengeg na nakalay toor tan lugor day pilipino ed España.
