anengneng to ramay kapankasal tan saramay angulop ed sikaran katayatdang a mamárikit a mangasimpit iran andi taldeng
insan to ninunot ya nasagmak dad may makapataktakut ya ipapatey, sinmabi panangasi to tan abawasay manliob a petang
na uló to.
Sinmabi pilalek ton mangilaban ed onman lan karakel na totoon andi kasalanan tan ninunot toy mansulat a mangipakabat ed justicia; balet ta diad sáya sinmabi sakey a luganan tan inmepas iran masaysayaksak di pári Salví tan pári Irene, tan naandipat iramay maabig a gagala ton singa labat dinmalan a lurem.
"Antoy walad siak ey?" kuantod nunot to; "maong itan pian midamay iran manbayar so matonung ed saray makasalanan!"
Insan to impatumbok a pamareen toy konsiensia ton kusokusó.
"Aliwa ak a manangidálem, tan ag manepeg ya abusoen koy impamía rad siak. Mas dakel ni utang kon linawad sikato nen saratan ya amin a mantetekep ay; sikatoy nankutkot na lubok di inak; saratan ay so amatey ed sikara! Antoy akibibiangan kod sikara ey? Ginawak so anggaay nayarian kon manbilay na susto tan makaná; ginegemtan koy mangilingoan tan mamerdona; intepel kon ami impasakbat dan kairapan tan say kekerewen ko labat so paulian daak a manbilay ed kareenan! Anggapoy gugunigonen kon pibibiangan ya anggan siopa..... Antoy imbalés dad siak ey? Maong met no mansasabuyag ed dagem so abisangbisang a kalamanan da! Mapalalo lay impanirap mi!"
Insan tod saya anengneng si Simoun ya inmepas ed luganan a sankaawit to may makapataktakut a lamparaan, ya osdong a binatak ton matantantan imay pasen a mamaarap ed takayan a singa bilang mannonunot. Alikas nen Basilion kinmapoy so parok na puso to, tan binmetel iray lima tan salí to ra, ya say pakanengneng tod kinen alajeron nankawes na andeket singa balbaleg ya aliktob na manlayap ya apuy. Anonday Simoun ed leksab na takayan a singa manduarua; agla wari onlilinaway Basilio. Ag akiremay impanduarua nen Simoun; intanguá toy uló to, sinmegep a matintinunos ed takayan tan naandipat.
Say pakaisip nen estudiante maganó lan onterak imay abong, tan saray dingding, lamparaan, sankaili, atep, doronga-
