"Labay moy ompatcy?" kuanton tinepet.
Sinintak nen Isagani ray abalá to tan inlulot toy pannenengneng to.
Sinali nen Basilio lamet ya igógoyor.
"Isagani, Isagani, dengel moak, ag itala manabala. Satay abong ay iniinay dinamita, magano lan onterak ya ontekiab, bengat lan kalilingo, bengat lan pan osisa..... Isagani, ompatey ya amin a natabonan!"
"Natabonan?" kuanen Isaganin inoman ya singa to tatalusan balet ta agton siansia ekaley mata tod samay dorongawan.
"On, natabonan, on, Isagani. Diad ngaray Dios, gálala! Ipaliwawak ed sika naani, gálala! Sakey a toon lalon masegsegang nen sika may siak, tinotulan tora.....Nanengneng mo tay silew ya ampotin malinlinew ay, a singa liwaway electricidad ya manlalapod batalan a báto? Sikatotay silew ya mangiter na ipapátey! Sakey a lamparaan ya pinanoy dinamita ya impasen ed pananganan ya iniinay dinamita met.....no onterak anggapoy ni sakey a bolilit a nabilay, gálala!"
"Andi!" kuay ebat nen Isaganin manpeyeng a maerermen; "labay koni diay natilak, unor la yan pakanengneng kod sikato..... nabuas sananey la!"
"Nasumpal siri kapalaran!" kuanen Basilion inmarawi lan anggaay siglat.
Anengneng nen Isagani kaaro ton masigsiglat ya onaarawin mapatpatnag ed awey toy aliwan galgalaw a takut, et siansian agto alisay mata may makaayayat a dorongawan ya andi dumá tod samay lakin taga Toggenburg a tatalaranan toy inaro ton ontandag unong na tungtong nen Schiller. Diad saman a hekta anggapo lay keran tood salas; wala laran amin ed pananganan. Biglan sinmebang ed uló nen Isagani ya nayarin tua ra may pagpaga tan takotakut nen Basilio. Anunotan toy lupa ton abaliw a napnoy takut, ya anta gendagendat et agto amta tay antakut ya agton balot nababalang so biskeg na linawa to, kanian nannunot. Sakey a kaisipan so pinmatnag a malinlinew ed kanunotan to: ontekiab imay abong insan wadmay Paulita. si Paulita ya ompatey ed makapataktakut ya ipapátey.....
Diad impakanunot to nia, alingoanan ton amin so arum. saray imon to, kaermenan to, irap na puso tan kamarerua; si mapangasin tubonbalo bukor na panangaro toy anunotan to.
