- Todo se sabe.1
Anggaman ontan lay karakel na ginawan pasakbay, sinmabín siansiad layag day karaklan iray dengeldengel, anggaman aliwa lan dagdaiset so inkauman da ya aliling day apukolpukol la. Sikatoy kukutengtengen dad lábi kaimbuasan ed abong na mayaman a boleg nen Orenda ya managlakoy alajas ed mabolaslas a distritoy Santa Cruz. Anggapoy arum a pitungtong day akamayamay iran kakaaro ton wadman. Anggapoy mansusugal na tres-siete, ni manotugtog na piano, tan si yogtan ya anak ton Tinay nanaalipanesan lan manggagalaw a bukor na songka ya agto natalusan no anto lay liket day totoon mantungtong tan mandengel na tutulisan ya onloob a mantakew ed kaabongan, saray pannonunong, saray sakoy pólvora, ya anta wadmay akamayamay a mararakep iran sigay ed pitoran nantopag ya abong na songkaan a singa ra ka kikindatan tan imimisan na masansanting iran sungot dan akasangi daiset, ta piano ikurang iran isegep ed abong ya ina. Si Isagani ya anta gendagendat a kapag wadman et misusongkad sikato ya palpaulian ton konwarin agto amtan sasaolen to, agto dagoen natan, tan ag oneseesel ya ambilbilunget so lupa ton manderengel na totungtongen nen Chichoy a platero. Pati si Momoy a kaaroan nen Sensia ya kapangpangoloan ed saray anak nen Orenda, ya marikit a maganggana tan masayaksak anggaman mabalaw no maminsan, ag sinmingger natan ed samay naugaliyan ton ayaman a dorongawan a nilabilábin panagtungtongan da nen inaro to, tan lapod saya, mauges so uló tonmay loron akasabit so kulongan tod mad petek a paritpit, loro yan napapalabiay panangarod saman ya abong nisesengeg ed masamsamit tan maararo ran salitan panangilugay ton kinabuasan ed amin day totood man. Si Kapitana Loleng, si makulí tan matudion kanunotan
___________________
1 Ompaway ya amin, nasukayan ya amin, ono anggapoy niamot.
