"Amot kayo!" kuanen Kapitanan Loleng; "nayarian da kayon palsaan.....amót kayo!"
Akaimis lamet si Isagani et ag inmebat.
"Si Don Timoteo," kuay Chichoy ya intuloy, "agto amtay pankasalanen to; sikaton dildili angikurang na kimey, sikato tan si kaaro ton Simoun, ya anggapo lay arum ya akalaok. Aguloy abong, linnad may Teniente Veterana, tan kayari ran binilin ya ami toon anggapoy pangibabagaan day agawa, imbaki daak la. Balet ta......
"Balet ta.....balet ta....." kuay Momoy ya inomanoman tan manggiwgiw.
"Dios ko!" kuanen Sensian sankanengneng toy inaro to tan manggiwgiw met ed pannodnunot ton wadmad bansal nen. lábin sakey; "saya lantin laki..... panon bilang ta tinmerak ey.....
Nilimgis toy inaro toy nantarok na sanok ed inakar to, tan pankelawan toy bayani to.
"No tinmerak lági.....'"
"Anggapoy nakdaan a mabilay ed entiron lansangay Anloague!" kuay Kápitan Toringoy ya insumpal a say ipapanengneng tod mata ray boleg to singa bilang mabaybayani ya anggapoy walawalád sikato.
"Masiado ni segaw kon sinmipot," kuay Chichoy ya intuloy; "ta say nonunoten ko so no wala labat lay angurabis, ono nansigarilyo, odino naplag ono naibong so sakey a lamparaan, natad sayan oras, anggapoy General tayo, ni Arzobispo, ni anto, ni empliado! Agalpong komon ya amin so wadmad punsia kalabian!"
"Virgen a Sankasantaan! Sayan laki ay....."
"Susmariosep!" kuan met nen Kapitana Loleng; "wadman ira nimet ya amin iray akautang ed sikatayo; Susmariosep! Insan wala met so abong tayod asingger diman! Siopa kasi.....?"
"Natan nakabatan yo," kuanen Chichoy a makalkalna, “balet ta agyo ibabaga. Sayan ngarem arumog koy sakey a kaarok ya escribiented sakey ya opisina, tan nen asalita mi agawa, impaliwawa tod siak, ta naamtaan to met ed arum iran kapara ton empliado.....Siopay isisipen yo bilang ya angian iran may sákoy pólvora ey?"
