"Anto tay walad sika, Carolino a?" kuanton tinepet.
"Anggapoy walad siak, kaskasian ko ra labat!" kuay ebat nen Carolino; "totoo met iran kapara tayo!"
"Mapatpatnag a bálo kad sayan anapan!" inebat nen Mautang ya elekan ton kaskasian; "panon sirin so panagtrato yod saray nararakep yod bakal ey?"
"Mas maong, anggapoy duaruad satan!" kuay ebat nen Carolino.
Agagan ag akasel a tampol si Mautang insan nagogonoyan singa nalmo toy makasengeg tan inkuanton amagamagá:
"Ah! amtak la no akin! Saraman kakabusol ira tan onlaban ira, saraya balet ay....saraya ay kabansaan tira!"
Insan inmasingger ya inopit ed Carolino:
"Agay lay agmo pakatalus! Ontay gagaween ed sikara ta pian salien day ontonganga odino ombatik insan ed satan..... pung!"
Si Carolino ag inmesel.
Sakey ed saramay periso akikasin ontondan magano ta walay mapilpilit a gaween to.
"Maatap yan pasen," kuay ebat nen kabo ya inmarap a mapagpagad mad palandey; "sulong!"
"Sulung!" kuan met nen Mautang.
Insan nginmisiw so sankaegnaan ton lewet. Yinmesyes si periso, nilimgis ton napnoy turing si Mautang insan to inkuan: "Mas maruksa ka ni nen say dílin kastila!"
Lalon sinisikdakan nen Mautang. Binmansag so ngisiw na bala ya tinmonbok so alaldak: naikbanan nen Mautang so pusil, akaayew na maksil ya inakop toy pagew toy sanduan lima to, tan tinmelek ya atumba. Sankanengneng nen periso ya manpoliweswes dimad dabok tan mantolapok so dalad sangi to.
"Tonda!" Iningal nen kabo ya pinmesiaw so lupa to.
Tinmonda ra may sondalon lingawlingaw. Manasasewek na daiset a manlalapod mad sanib na mapalet iran kasabitan tan ankelag iran kakiyewan dimad tagey na palandey. Nginmisiw lamet so bala, nangel lamet so alaldak, tan si kabo naknad ulpo, nipaulsong ya mapalatopot so ayew to ran maramsak. Mapatpatnag ya sinabat iran lalabanay totoo ran akasanib ed saramay ankakabaleg a batod man ed tagey.
