Dimad panaayaman tod kabukóran ed gilig na dayat a sankanengneng ed silolokas iran dorongawan so tapew na danum a lawas mandaldaluyon tan ninmatnat ed anggaay nagawat na mata ya singa la akitekep ed tawen, si pári Florentino tataligaygay toy kabukóran to ya manutugtog ed armonium na sonata ran mabinbinta tan maerermen a singa aakompanyaay ongol day ombebetag a daluyon tan meremeré ray kakiyewan cd kaabay a takel.
Andukey iran nota, tibtibukel, tan mandagdageyen ya aliling na sakey a pikakási, anggaman napatnagan a lakí manutugtog, so narerengel a manlalapod samay daan ya armonium; si pári Florentino naong ed músika, saramay tutugtogen to gawa to ran dili ya ag ira imparaan no agta manlalapo rad liknaan to ed saman a bekta, tan manlapod bukbukor to ibebesngaw to ray masakit iran kaermenay puso to.
Ta diad katuaan mapalaloy ermen to. Si maong a toon kaaro to ya Don Tiburcio de Espadaña kasiposipot to ta ibabatikan to lanti asawa to. Saman a kabuasan akaawat si pári Florentinoy antikey a sulat na sakey a teniente Guardia Civil a belas toy onia:
"Pinablik a Capellan:¹
Kagkapangawat koy telegrama nen komandante ya oniay Jugan to: español escondido casa padre Florentino cojera remitira vivo muerto.2 Manlapod malinlinew so telegrama, pasakbayan yo lay kaaro tayo pian agko la nasabi no onlaak ditan a mangerel ed sikato na a las ochoy lábi.
- Say maarod sikayo.
- PEREZ
- Say maarod sikayo.
__________________
- 1 Pananawag ed pári ya walad kargo toy sakey a capilla ya panmimisaan
to met. No maminsan onkana met lan pananawag ed siopaman a pári.
- 2 Kastila inmamot abong pari Florentino aleen, itulor dia mabilay instey.
-385-
