P.D.
Poulan yo yan sulat."
"A...a...gay layan Victorina, agay la yan Victorina!" kuanen Don Tiburcion ataatá; "n...na...na... sabisabin papaltog toak."
Ag apasungsungan nen pári Florentino: maong lay gagaween to, agto napanisia ya samay cojera1 say labay to angankon ibaga cogerá2 et alingo labat so inkasulat to; ya samay kastilan inmamot aliwan si Don Tiburcio no ag si Simoun a sinmenpen diman nen kaduaen, a sugatan tan nengneng na ombábatik, ya akikasin mipagtuloy. Ag manisiay Don Tiburcio; ipasout ton singa lewet a samay salitan cojera et say dilin piley to, ya inter a sinyas a pakabirbiran ed sikato; talagan gawa nen Victorina man ta paskaren ton pilit a papawayen a papawilen mabilay may inatey, unong na insulat nen Isaganin nanlapod Ibale. Tan si pangaskasiyan ya Ulises tinmaynan ed abong nen pári a linman inmamot ed alulong na sakey a komikiyew.
Anggapoy anggan mogmon duarua nen pári Florentino ya samay kastilan abitlad telegrama et si alajeron Simoun. Sinmabid man a maamoamot, a sikaton díli nanlibit na maleta to, sugatan a mandála, ambilbilunget so lupa to, maerermen, tan makapkapoy. Unong na sipor lan ugáli pilipino ya mapaaro tan maparaan lawas a mamarawes, inako nen párin pinagtuloy ya ag tinmepet na anggan antó, tan manlapod anggapo ni nangelan ton balot ed saray agawgawad Ibale, agto natalusan no akit onman. Sa labat so alenleneg a linmad nunot to so manlapod sinmipot lay Kapitan General a kaaro nen alajero tan manotulong ed sikato, sara angankoy kakabusol to nia, saray apappaunong nisesengeg ed sikato, saray apasákitan, ginmalaw ira natan a mangigagaem ya ombales, tan si General ya interino³ pápaspasan to met anganko ta pian makapinabang ed saray kayamanan ya akelkel to. Kaniantin ombabatik! Akit sugátan balet ey? Panoy inkasugatan to ey? Manbibitkel lawari? Anto, asugatan day mangigagaem ed sikato, ono tuan naaksidente unong na kuanto? Odino nala to rad ibabatik tod saray kakabusol to?
___________________
- 1 Say piley.
- 2 Aleen odino erelen.
- 3 Sinmandi, anggad isabi balon Kapitan General a manlapod España.
