"Sakay yan estudiante ya insipan tod sakey a kabaleyan ton marikit ya asawaen to, balet ta nen ataynan to, alingoanan to lan aminpinsan. Samay bii diad katooran to inalagar tod andukey a taon; apalabas toy kalangueran to, matabatabá lan binmalbaleg so laman to, tan sakey ya agew nangelan ton samay abayag lan aalagden ton inaro to, arzobispo lad Ibale manaya. Nankinon lakí tan pinmarungtal cd kinen arzobispo ya kekerewen toy panumpal toniay sipan to. Manlapod agya nayari, impagawa nen arzobispo may ungib ya anengneng yon pinuletay sangab to, ya aparakep na tanaman iran kalabkalab. Diman nanayam, diman la inatey tan diman met la impunpon, tan unong na tungtong day mamásiken, si Donya Jeró nima ontan lay tabá to ya no ontubong et nakaukolan toy ondiking. Say inkibantog ton inkantada nanlapo ed ugáli to ya ibanbantak to rad ilog 50 lipong iran pilak a pamapakanan toy marakep iran kakanen ed saray dakdakel a lalakin ondadago ed saray punsia to. Wala la balet so impanat ya iket ed dalem na danum a dadapuan daran may liplipong ya oniay kakaurasan da. Anggapo ni angankoy duamploy taon a linmabas a say danum na ilog et nasasabi ton sisipsipuakan so sangab ton man ya ungib, balet mankakalkalnan onsusoner a singa met pankakalkalnan kabubural tonian tagaomen ed kanunotan day indio."
"Marakep a tagaomen!" kuanen Ben-Zayb; "isulat ko pian nipalapag! Makapasibeg!"
Linmad nunot nen Donya Victorina so manayam ed kaoli- bay ton man a ungib, tan ibaga to lawari, nen abaat ed insalita nen Simoun.
"Antoy kuanyod saya, pári Salví ey?" kuay tepet tod samay pransiskano ya nengneng toy manmumotektek; "ag kasi mas maong no imbis a impanayam tod ungib et inloob to lad konbinto ray mamadre, singa bilang diad Santa Clara?"
Ag apukpokan nen pári Sibylay impakagalaw ton singá nikelawan ed impakanengneng ton akigtot si pári Salví ya pinasekiapan toy matay Simoun.
______________________
1 Diad beaterioy Santa Clara ya aasikasoen day paparin pransiskano, pa pasooten nen pári Salvi so kaarawan nen Ibarra ya nammadre nen inisip ton inatey laya. Diad sayan ayaman day mamadre, tan ontan met ed kolijioy Santa Isabel tan arum niran kolijio ed Ibále, kuay dengeldengel ta wala ray paparin manaabuso ya ipapakana ran sasamboten so kipapasen da ya ministroy Dios.
