kayoy yaamot ko, kapilitan ya ipiyak ed sikayoy kaunoran a
linawak..... nakaukolan kon ipanengneng ed sikayoy petepeteg a impanbilay ko..... Diad bektan pisíyan kod bilay, labay kon napalemew so makadedetdet ed kalakal ko..... labay
kon napaliwaway sakey a duarúa..... Sikayo ta ontan lay elet
na pananisia yod Dios.....labay kon ibaga yod siak no tuan
walay Dios!"
"Say panumpay samal, sinyor Simoun.....walay inatol kon apomorfina.....walay éter, cloroformo....."
Tan si pári itutuloy ton siansiay panaanap tod sakey a praskon melag, anggad ag iningal nen Simoun ya inmalipanes:
"Anggapo lay kaná to.....anggapo lay kaná to! Agkayo mandadarak na oras! Ompateyak, ya itarok kod lubok yaamot ko!"
Si pári, agagá, intalimokor tod mad panagdasalan, tan nandasal dimad sali Katawan a pinepet toy lupa toy sandua to ran lima, insan inmalagey a mabinbinta ya singa naawat tod Dios to so amin a sekder, amin a kabintaan, amin a pakauley na Manangokum ed saray konsiensia. Insingger toy sakey a silyon ed cloan nen agmakayari tan inyurong ton sipaparaan a mandengel.
Kapangigapó nen Simoun a nansalitan makalna, nen imbaga toy ngaran ton peteg, si matatken lan pári, akasuner tan ninengneng ton akebiew na mapalalo. Akaimis na ampaipait si agmakayári. Diad inkabiglaan to, si pári agto apukpokay inkasikato, balet ta abalnot ton tampol so liknaan to, sinaniban toy lupa toy panyo, tan intewek to lamet a mandengel.
Tinungtong nen Simoun so makapasinagem ya impanbilay to, say impawil ton nanlapod Europa ya labintaloy taon la natay linmabas, a napnoy ilalo tan maliket iran kanunotan ed arapen, pinmawil ya ikasal toy kaarowan ton sakey a tubonbalon marikit tan sipaparaan a manggaway maabig tan mamerdonad amin iray akapaunong ed boleg to, dapot labat no paulian da lan manbilay ya ag sigensigenen. Sananey so agawa. Liman lipotan so agto ataltalaranan ya angitoldon ed sikatod utel na sakey ya inalsá ray totoo ya imparaan day maamot a kakabusol to tan impakasalanan dad sikato; galang, kayamanan, aro, maligan arapen, kawayangan, abalang ton amin, tan no aluksoan toy patey nisengeg labat ed tulong na sakey a kaaro ya inter ton ag kinawanay bilay to pian nilaban to. Diad onman,
