"Onaa ta singa makulang a tuloy na panangasikaso," intuloy nen Simcun ya amagamagá, "so pangiter na palandey a bató ya panayamay sakey a biin niludlurey tayo ray ilalo to; tan singa met selang ed kasantosan so pamaulian ed sikaton naliktob na talbay tokso ed sakey ya ungib ed pangdel na ilog; singa la tungtong na inkantado. Magmaong ni komon, baleg nin panangasi, marakdakep nin dengelen, tan lalo nin ontukoy ed ugálid sayan bansá no intubong to komon ed Santa Clara ya aliling nen Eloisa' ta pian nadaldalaw ton napaliket. Antoy kuanyo?"
"Agko nayarian tan agko met manepeg a totulan so gawagawa ray arzobispo," kuay inebat nen pransiskano ya mauges so uló to.
"Sikayo balet ta sikayoy Gobernador Ecléasiástico, ya walad pasen na arzobispo tayo, antoy gawaen yo no nagawad sikayo tan ey?"
Sinintak nen pári Salví abala to, insan inkuanton matantantan:
"Anggapoy kakanaay pannunot na ag nayarin nagawa.... Balet ta siansia lan sasalitaen iray tagaomen, agyo lilingoanan a say sankarakpan manlapod sankatuaan, say milagro nen S. Nicolas, ya anganko anengneng yo lay natetebag lan simbaan to. Tungtongen kod kinen sinyor Simoun ta agto ni anganko nangel. Nen saman kono, ilog may libsong napno ray buaya ya ontan lay kakabaleg tan sibá ra ya labanan daray sakayan a napaldeg dara ed maminsan labat lan sikdak na ikol da. Kuanda ta sakey ya agew, walay sakey ya intsik a bugkalot ya agto labay so manpabiniag, ya onlalabas ed arap ton may simbaan nen biglan pinmarungtal ed arap toy dimo nio ya nankinon buaya, pinigar toy sakayan ta pian nakan to, insan to awitey kamarerua to ed inpiernos: Diad puyay Dios, samay intsik tinmawag ed S. Nicolas tan tamtampol a maliw a bató may buaya. Kuanday mamasiken ta mamasiken ta nen pa naon da, magmainomay nin nabirbir imay buayá anggaman atapingtapingan lamay bató; siak a díli nayarian kon ibaga ya nabirbir ko nin malinlinew so uló tan no sayay pannengnengan talagan balbaleg a tuan buaya."2
____________________
1 Sakey yan biin nibantog ed katooray panangaro to ya nanmadre nen akopisian ed inaro to.
2 Diad awaray Pilipinas ya insulat day papári wala yan akasulat a milagro.
