Kinmirem ya aminpiga may Kapitán, pakapatnagan ya inmalipanes, balet ta diad impakanengneng tod matá ran amin na pikakasi ra, kinmurang na pigara ya amaarap ed dulong tan kinonineng to may gilig.
"Nengneng yod man ay," kuanton makalkalna ya ngalngalin ag narengel, kayari ton siniguro ya anggapo ray totoon arum; "say kuanton may kabo ya angipangulo ed saray angusil, nen akulong si Ibarra, tinmaboy dimad asingger ed Kinabutásan, tan nanlangoy ed dalem na danum na duara angankon milla ya inuran day balay paltog kapag onlimuas ya onlinawa. Nen banda lad man ay, abalangan da, insan dimad aragdawi ni, ed asingger lad gilig, anengneng dan singa kamlatay danum na dalá.....Nanunotan ko, sustosuston labintaloy taon la natan iman a inkagawa ya ag onsulok ag onkulang."
"No ontan sirin say bangkay to.....?" kuay tepet nen Ben-Zayb.
"Tinmipon ed bangkay nen amá to," kuay ebat nen pári Sibyla; "aliwa tan filibustero1 met so amá to, pári Salví?"
"Sikato ramay tatawagen kon punpon a mamura, antoy kuanyo, pári Camorra?" kuay Ben-Zayb.
"Ibabagak lan sipor et a filibusteron amin iray ag manbabayar na mablin purpon," kuanto nian inmebat a samit so clek to.
"Akin kayo, sinyor Simoun?" kuay tepet nen Ben-Zayb nen nengnengnengen to yan ag onggalagalaw tan sinonunot. "Nanaelew kayo, anto apasapasal kilan manbaroy! Diad sansankaterter a danum labat a singa sayay pansasakayan tayo ay?"
"Nepeg yon amtacn," kuanen Kapitán ta ginmalet lay panangaro to ed amin daran man a pasen; "ta agyo nayarin tawagen yay sankaterter a danum ta mas baleg nen say dinan man a libsong ed Suiza, tan baleg met ni nen say amin day libsong ed España ya nantetekep; wala laray anengneng kon mamásiken a marinero ya naelew ira dia."
_____________________
1 Indio ya sungpad uloy na España tan malaboy na kasiyam na Pilipinas ed España.
