ro toy sakey ed saray manaayam ed sikato ya onsublay tanem. Si masegsegang a Tales pinmesiaw so lupa to, ginmanunggong so pakangel to, singa asanibay matá toy kelpan amalangá ya diman to sankanengneng si asawa to tan anak ton amespesiaw tan mabmabeng a manpapanabos nen agda la nisungdo may petang dan pawilpawil! Insan onsublay a singa sankanengneng to may makdel a takel ya apanmaliw a mapatar a kaumaan, sankanengneng toy managagos a linget a singa manasalog ed samay bináka, sankanengneng toy inkasikaton díli ya manbabaka kalamor a letakletak so uló tod agew, a nasusugatsugat iray sali to ed nasesegkal to ran batobato tan lamulamot, sanleganan ton man a párin mamaspasiar a nanluganan a manomtumbok ed sikaton aliling na aripen a sinaliw imay toon labay da natan a pangitdan nimay dálin a kinimeyan tan pinaboná to. ¡Andi! Ag nayari, ag nayarin maminlibo! Lablabayen to nin onlereg iran maminpinsan iraman a kaumaan ed karaldalemay dalin ya itában to ran amin ya itabon! Siopa man a sankaili ya akit naitday pankatonungan a mangala ray úma to? Wala pa lági intarok ton nanlapod dálin ton nianakan ya anggano sansankagemgem ed saraman a dabok? Akin pinikó toy anggan saksakey a gamet day lima to ya amagot na anggan saksakey ed saray lamulamot a nanbebenlagan diman?
Diad irap na linawa to ed pamapagiaw ton may pári ya ipatnag ton pilit so pakayari to ed arap da ran may manbanbantay ya arum iran kasamak, si Anakbanwan Tales tinmongangá, impaawet ton ag manbayar na anggan saksakey a kuarta, tan manlapod lawas singa walad arap day matá to may kelpan amalangá, inkuanto ya ipalugar to ra man a kaumaan labat ed toon salugen to ray dalá to.
Nen anengneng nen masiken Selo so lupa nen anak to, agla pinmangayan amitlan may buayá, no agta ginawa toy anggaay nayarian tod pamakepáy sanok to ya impanunot to ra may bangabanga tan sayasayap iran dálin a peteg, tan say marlas a nagagawa ya say manalod kulkol et naandiay patí aysing to.
"¡Dabok so pansumpalan tayo, amá, tan inanak itayo met a lakseb!" kuay ebat to.
Tan impaawet toy ag manbayar tan ag mangiter na anggan sangsangkarangan ed saray dálin to, no anggapoy nipa
