Nen onsabi Basilio ed San Diego kaplesay libot na Paskoy Inkianak ed kalansanganan. Naabalad dalan na pigapigay oras ta samay kutsiro alingoanan toy cédula to, inerel na Guardia Civil, pinekpek dan aminpigay putay paltog insan da ni inawit ed kuartel ya indongó ed komandante.
Natan akatonda lamet so luganan ta onlálabas so libot tan samay kutsiron apekpek inekal toy sombriro to tan maraldalit a mandarasal na Amami ed samay inmonan talintaon sinakbat ed andas ya onlalabas a nengneng na baleg a santos. Sakey yan masiken a nanbalbas na andukerukey tan manyoryurong ed tambib na sakey a lubok a walad silong na kiew a napnoy manomanok a sinikang. Sakey a dalikan a pantogtounay banga, sakey a lasong tan tubong a panagtemekay buá so wala ra labat a kagawaan to, ya singa pangipanengneng a samay masiken et manaayam lad tambib na lubok a diman la manluluto. Sikatomay talintao nen Matusalem unong na itsura ray sasantos ed Pilipinas; diad Europa say kapara to tan katiempoan to anganko si Noél (Santa Claus) balet ta saya maligligay iupa to tan mas maliket.
"Nen panaon ya inpanbilay day sasantos," kuantod nodnunot ton may kutsiro, "sigsiguron anggapo ni ray Guardia Civil, ta talagan anggapoy makapanbilay na andukey ed panagpekpek day putay paltog da."
Kalabas ton may santos a masiken, nitan laran manomtumbok so Taloran Ari ya manlukso ray pangabkabayoan da, lalo lamay kabayo nen pugot ya Arin Melchor a ngalngali to laran natalapos iramay ibiba to.
"Anggapon tua anganko ray Guardia Civil," kuanton insumpal nimay kutsirod nunot to ya manibibeg ed saraman a
maliket a panaon lan linmabas; "ta no andi satay pugot a man-
