abawasan iray sabitsabit tan parakep da, tan ontan
katangtaon no ipara ed samay taon a binenegan to..... Ang-gapo wari togtog ed kalansanganan, aliwan amin ya abong et
pakangelay masaysayaksak a tanol ed kosina, tan si Basilio
inpasen ton makasengeg so mandenden ya irap na kuarta, say
makapoy a prisioy masamit, say inkaapay pagey, say inkasalot na masulok a kapaldua ed saray dureweg, tan say mantagey iran usos ya ag amtay sengeg tan ngoró tan ontan met
na manbetbet a panaglames day Guardia Civil, a sikatoyay
mangeerep na amin a likeliket ed báley.
Sikatoyay nonunoten to nen biglan nangel toy makmaksil tan masebesebeg ya alto!¹ Onlalabas irad arap na kuartel tan sakey ed saray bantay anengneng ton narep so parol ton may luganan. Ginapoan ton nantamian imay masegsegang a kutsiro ya agton balot sisiaen so ibabaga to nia ya say naupotay silew to say bayag na libot, tan manlapod naerel lan ang-gapoy sapo ya ag manosumpal na ganggan tan ipalapag da ni, si Basilio ta kabusol toy guló tan mapasakbay, inmepas la tan nanakar lan sankabitbit toy maleta to.
Sikatomay San Diego ya báley to, ya anggapod may kanayon ton anggan saksakey.....
Say alenleneg ya abong a masayaksak so impakanengneng to say abong nen Kápitan Basilio. Saray siwsiw tan nganak mankiak iran manaalagar na patey, a kabansag na mabetbet a tanol na tartar na asalian tan pansanitsit na taba ya manleluag ed kawali. Peles na punsiad man ed abong, tan onsasabin anggad lansangan a milmilad sibok na dagem so ambalbalingit ya asewek na igigisá ran sirasirá tan lolutoen a masamit.
Dimad silongan anengneng nen Basilioy Sinang a panpandaka nin singa nen saman, anggaman tinmabatába nanlapod impankasal to. Tan diad baleg a kelaw to, atakiling to met dimad bandad dalem a katungtong toy Kpn. Basilio, si kura tan si alférez na Guardia Civil, si managlakoy alajas alajas a Simoun a siansia nin akasalming na inanagan tan saman ni itsura ton singa anggapoy tatalawan to.
"Sikato la tan sirin, sinyor Simoun," kuanen Kápitan Basilio: "onla kamid Tiani ya mannengneng na tagiláko yo ran alajas."
___________________
1 ¡Tonda!
