"Labay ko met komoy onla," kuanen alférez; "ta nakaukolan koy kairel na reloj balet ta dakdakel so gawak.....no nayari labat ya ibilin ko lad kindi Kápitan Basilio...."
Inmebat si Kápitan Basilio ya sikato lay akauley tan panliketan to, tan manlapod labay ton naalay maong a linawa nen alférez pian agto nia sagotsagoten ed saray managkimey to, agto labay ya awaten so kuartan kakaoten nen alférez a pilit ed bolsa to.
"Rigalok lad sikayo ed Pasko!"
"Agak onabuloy ed satan, Kápitan, agak onabuloy!"
"Andibali, andibali! Akauley iti la naani!" kuanen Kápitan Basilio ya bansag na andawes ton marakerakep.
Si kúra labay to met so sankaparis ya ikaw na bii tan inbilin to met ya impikási ed kinen Kápitan ya isaliwan to.
"Say labay ko say maong a bató. Akauley iti met la naani!"
"Agkayo mapaga, pári kura," kuanton may mapaguston too, ta labay to met a maong so papil tod simbaan. Sakey ni, no tungtongey tua, sakey labat lan makapoy a salita nen kuran nipaakar ed sikato masulosulok lan makasagensagen ed sikato tan pakagastosan to ni angankoy dobli. Kanian samay sankaparis ya ikaw kapilitan iman a rigalo. Si Simoun, legan to nia, dayew lan dayew ed saray alajas to.
"¡Makapataktakut yan too!" kuanton may estudiante ed nunot to; "amin a sukong panninigosioan to.....Tan no sisiaen so ibábagay sakey a too sasaliwen to lan lamang ed arum a totoo ed kapalduay bilí da labat iray alajas ya inlalako to lan lamang a sinasaliw day totoon irigalo..... Makakalmon ami too ed sayan bansa andibali kamin taga dia.....
Tan amaarap lad abong to, odino abong nen Kapitan Tiago ya pababantayan dad sakey a toon pipiyaen da. Saya ta mapalaloy panederleng tod kinen Basilio nanlapod samay agew ya impakabantay tod sikaton angopiray totoo ya amagamagan singa labat manlalabak na nganak, tatalaranan to ta ipakabat to ray balbalita. Duarad saray dumaralos apiriso, say sakey adusan ipaalis..... tan inatey so pigaran dureweg.
"Ontan labat lan lanang!" kuanen Basilion mauges so uló to; "kapag onsabiak dia apasakey so idádalem yo!"
