loy panagpatubong dad pasen a paniksamenan ta pian maganó —apaktak ira kanian adusá ran umanen a pawilen da lamet so kurso.
Diad komaduan taon, analoy dakdakel so kinomponi ton ibubulang a manok nen Kápitan Tiago, kanian pinabalato tonia, tan si Basilio insaliw ton tampol na sapatos to tan sombriro ton fieltro. Nisesengeg ed saya tan saray ourmaen ton kawekawes ya ipapatawir nen ámo tod sikato, ginmangganay daiset so itsura to, balet ta anggapo nin siansiay naumanay kipapasen tod eskuilaan. Diad saman a karakel dad klasi nakaukolan a walay ibabagay sakey a manaáral ta piano natawag toy imanoy propisor to, tan no say manaaral et agto ya agawaan ed inmonan taon, odino agto nalad gapoy maong a linawa ray propisor to, manpairap lan naimano ra ya angga lad sampot na panaral to. Onia man, si Basilio inlulot toy panaaral to ta sikato lanti maseet.
Naoman so kapalaran toy daiset nen kasapat tod komatlon taon. Say abanaan ton propisor sakey a dominikon malinak a kanunotan, magalaw tan mapálek ed saray babangatan to, mangirasngiras tan naynay lawarin say pangipapaliwawaen toy liksion et saramay manaaral lan lamang a kalabián to; tua ta sikato et pasasaragen toy anggano anto latan ya ibaga ra. Diad sarayan agew si Basilio lanang lan akasapatos tan akaaysing na malinis a kapanpirinsa. Manlapod nanaimano nen propisor a samsamet makaimis no manpalek, tan sankanengneng tod matá toran maerermen tan ankabaleg so singa andi ebas a tepet, ipapasen ton mureng, tan sakey ya agew tinalaga ton ipaamta ya ed entiron klasi kanian tinepetan to. Dinalatdat nen Basilioy liksion a nanlapod ulon anggad ikol ya anggapoy alingoan ton anggan melmelag; pinangaranan nen propisor na loro, anungtong na nanelekay entiron klasi tan piano napanoan ni panelek da tan ontan met a napaliwawa toy inkikalkalat na impangaran to, tinepetan to nin aminpiga ya bansag na inkindat tod saramay kalabián to ya singa bilang pangibaga toy:
"Talaran kayo ta walay panelekan lamet."
Si Basilio ed saman amta to lay kastila tan inebatan toray tepet ed mapatpatnag a gagala ton ag manpalek. Inmalipanes iran ami wadman ed sayan inkagawa, say ilalo ran yebat ton panelelekan da naapa, anggapoy akalek, tan samay pári agton
