Sikara yay nonunoten nen Basilio nen wadman ed abay na lubok nen ina to. Ompawil la lawari ed báley nen singa walay apasikmatan ton liwawad man ed utel day kakiyewan tan nangel toy singa natataksing iran sanga, tanol na bakat ya ondadapod dálin tan kalasakas na bulobulong..... Narep imay silew balet ta samay tanol manasingger tan manlinew insan kasanlilikna anengneng toy sakey ya aninod man ed pegley ton may kinoral a mamapaarap dimad kawalaan to.
Si Basilio sipor ya aliwan mamalí lalo la nimet natan nen akamayamay la ray nilalabak to ran bangkay tan pinapasipot ton manpapanábos; balet ta saray gendat lan nansasaloran a tagtagaomen nipaakar ed saman a maerermen tan kuandan mapalion a pasen, samay kaaralem na lábi, say bilunget, say maerermen a panngisiw na dagem, saray tongtungtong a nangnangel to nen ugaw ni, singa ra naimpluensiaan tan alikas ton maparoparok sa puso to.
Samay anino tinmondad man ed biek na baliti tan sankatakiling nen Basilio ed kongaw a nanlaetay duaran lamot a diad kinakabaleg da et nanmaliw laran singa sengeg na kiew. Kinaot tod dalem na kawes toy sakey a paroi a maliwliwaw ya nen inggaton tod dálin, asilewan toy botas ton panagkabayo; amin lan arum a pasen na laman to walad ambilunget. Samay anino singa to sinosukisok iray bolsa to, insan yinmokon angikágit na nguroy sadiok ed sampot na baston a maregkel. Nikelaway baleg si Basilio ta singa to abirbir so inkalaman tan ereng nen alajiron Simoun. Ag alingó ta sikato manayan tua.
Samay alajiro mankokutkot, tan no arum naliwawaay lúpa to. Ag akaiyan imay salming ton inanágan ya ontan lay pamapauges tod lupa to. Akigtot si Basilio. Saman imay toon agto kabat a labintaloy taon la natan a nankutkot dimay lubok nen ina to, salambengat ta tinmatken la, amalakpak lay buek
