salat kayoy kanonutan, anap yoak labat dimad abong ko ed
Escolta, tan panliketan koy antoman a pakatulong ked sikayo."
Akisalamat si Basilio ed antikey a salita tan inmarawi la.
"Alingoak kasin tua?" Kuanen Simoun ya inmeremeré nen kabukbukoran to la; "manduarua kasí ed siak odino mapalaloy pangiaamot toy momurekdeken ton mauges a ibales a mapaga ed pangibesngaw ton anggano diad kabukoran na kaitlekay lábi? Odino diad dukey lay taon ya inkaaripen to et narep lad puso toy amin a liknaay too, likor labat iray liknaan a miparad saray ayayep a manbilay tan manilalak? No bilang ta onia, makapoy sirin so sokugan tan nakaukolan ya umanen a tunawen.. .Kapilitan sirin so panpatey a panpálin; ompatey iray anggapoy kakanaan da tan natilak a manbilay iray mabiskeg a masulong!"
Insanto intuloy ed maerermen tan makakebiew a tonoy bosis a singa bilang walay pisasalitaan to:
"Agámil yo pay ános sikayon angipatawir ed siak na ngaran ko tan abong ko, manános kayo pa ni! Apaandik ira ya tan ontan met na dálin kon nianakan, maligan arapen ko, inaway bilay ko, pati saray dilin lubok yo ra..... balet ta man ános kayo! Tan sika met, mablí tan masúrin kamarerua, puson maabagey a nanbilay kan saksakey so kanunotan a nanarid muling mo, tan imbágat moy bilay mon agmo ninunot a tinakpan so pisasalamat may pandayew na anggan siopa, agámil mo pa met so ános.² Saray gagaween ko agmora lagi abobonan ta dumá rad panagnunot mo, balet ta sikaray sankasiglatan..... Manasingger lay agew tan diad ipelnak to, siak a díli so onlan mangipakabat ed sikayo. Kanian, say ános pay agámil yo ni!"
___________________
1 Ngaran na sankaimportantiyan a lansangan ed Ibale ed sayan panson. Diay kawalaan day sankabalgan iran basar tan saray sasaliwen a marakep tan mabli.
2 Si Elías sa labay ton ibaga dia.
