mon ta si Anakbanwan Tales et nanayam ed abong inbis a liwagliwag dimad uma to, agda narel. Sakey met ni, pakanengnengan iman a inkagawa na panudusay tawen ed saray ontonganga ed labay na togiop day papári ya akikailian to.
Nen nangelan nen Hermana Penchang, samay akulaw a masantos a panaayaman nen Julí, amidua ono amitlon imbagá toy susmariosep! Angariáma tan inkuanto:
"Mabetbetbet ya itdan itayoy Dios na kairapan ta makasalanan itayo odino wala ray kakanayon tayo ran makasalanan a kanepegan tayo ra komon ya imbangat na aro, takut tan panangigalang ed Dios, et ag tayo ya inasikason ginawa."
Say labay ton ibaga ed kakanayon tayo ran makasalanan si Juliana, ta diad panagnunot tonian madasal ya akulaw, si Julí sakey a baleg a makasalanan,
"Palurey kayo tay sakey a marikit a taon lay mimiasawa et agto ni amtay mandasal! Jesús, makapakasalanan! No mandasal na Ave María tan Santa María, matintinunos, ya ag labat ontonday daiset kayari say Kataway walad sika, tan mo kamin managkasalanan, a singa manepeg a panagdasal na amin a maong a kristiano ya walay takut tod Dios! Susma- riosep! Agto amtan dasaley oremus gratiam1 tan say panamitla to Mentibus anta say susto méntibus. Say makangel ed sikato nabaloan dala laingon a say ibabaga to suman de ibus² Susmariosep!"
Insan mangariáma a singa pangipaliis toy kanunotan a makapakasalanan tan misalsalamat ed Dios ed inkaplag nen amá ed lima ray tulisan ta piano nackal ed kasalanan si anak, tan makaaral na saray marakep a kagagawa ya, unong ed saray papári et nepeg da lawas a parakepay dinan man a biin kristiana. Sikatoyay makasengeg na pangipupugeran tod man ed abong to ya agto ibulos ya onlan mankomponi ed kinen láki to, ta si Julí nakaukolan toy manaral a mandasal, manbasa ranmay liblibron ankelag ya ibubunog day papárin ampoti, tan mankimey met anggad pakabayar dan pakapangipawil nimay dúan lasus tan limamploy pisos.
Nen nangelan ton linmay Basilio ed Ibale ya aleen toy tipon ton panundon ed Julí, alutolutó lad linawa nen akulaw a saya et aliwa lan talagay kasumpalan ton angga lad angga
_____________________
1 Dasal a pisasalamat.
2 Suman a binalkot na bulong na niog.
