96
ug si Kapitan Basilio, ang gipanugon sa “alferez” nga talikala sa orasan, ang mga ariyos nga gipanugon usab sa kura ug uban pang mga butang nga iggagasa; ang ubang mga banay sa lungsod sa Tiani, aron dili maiwit sa taga San Diego, miho-ho usab sa ilang mga bulsa.
Si Simoun namalit usab ug mga alahas nga karaan, mangilis siya, ug gidala sa mga inahan nga daginutan ang ilang mga pahiyas nga dili na magapulos kanila.
— Ug ikaw, wala kay alahas nga takus ikabaligya? — nangutana si Simoun kang Kabesang Tales sa pagkakita niya nga kini nag-utas ug tan-aw nga maibugon niadtong pamalit ug pangilis nga ginahimo sa iyang atubangan.
Si Kabesang Tales miingon nga ang mga alahas sa iyang anak nga babaye gipamaligya na ug ang nanghibilin pulos na walay hinungdan.
— Ang “relicario” diay ni Maria Clara? — nangutana si Sinang.
— Tuod no? — miingon si Kabesang Tales, ug unya mikalit pagkidlap ang iyang mga mata.
— Maoy usa ka “relicario” nga dinayandayanan ug mga brilyante ug “esmeralda” — matud pa ni Sinang sa magbabaligyag alahas; — gigamit kana sa akong higala usa siya mosulod sa pagka-mongha.
Si Simoun wala motubag: mitutok siya pagtan-aw kang Ka besang Tales.
Human moukab ug daghang mga sudlanan, hingkaplagan niya ang alahas. Kini gihiling pag-ayo ni Simoun, giukab ug gitakpan niya sa makadaghan: mao gayud kadto ang “relicario” nga gitaklay ni Maria Clara sa pangilin sa San Diego ug mga inaghat sa kalooy nga sa hinanali iyang gibati niadtong higayona, gihatag niya sa usa ka sanlahon.
— Nakauyon ako sa iyang panagway — miingon si Simoun — pila ka pisos ang buut ipabayad niini?
Si Kabesang Tales wala makatultol pagtubag, mikalot sa iyang ulo, unya sa dalonggan, ug mitan-aw sa mga babaye.
— Naibog ako niining “relicario” — mibalik pagsulti si Si moun; — buut ikaw ug usa ka gatus . . . lima ka gatus ka pisos?
