- 127
lawak. Ang mga tinon-an, sama sa nangabalo, nanulod nga
nagmulo ngano nga giklasehan. Si Placido Penitente misunod
sa iyang mga kauban.
— Penitente, Penitente, — gitawag siya sa usa ka tawo nga mao rag nagtago ug nagdalag kahadlok; pirmahi kini.
— Unsa man kana?
— Ada, pirma lang
Si Placido sama sa gibitad ang dalunggan. Nahinumdum siya sa kaagi sa usa ka Kabesa sa iyang lungsod nga tungod sa pagpirma sa usa ka papil nga wala niya hibaloi kon unsay sulod, nabilanggo sulod sa pila ka bulan ug diriyut pa hinoon hinginli sa Kapopod-an. Usa ka oyoan niya, aron mahipatik sa iyang panumduman kadtong hitaboa, gilusi ug giinat sa kusog ang iyang dalunggan. Ug kanunay na gayud nga bation siyag kasakit sa iyang dalunggan kon makadungog na ugaling siya nga dunay papil nga papirmahan; mahinumdum siya sa paglusi kaniya sa iyang oyoan.
— Undo, pasayloa ako kay dili gayud ako mopirma kon dili ako masayud sa sulod sa akong gipirmahan.
— Kabuang mo gayud kini: unsa may imong kahadlokan nga namirman man gani ang duha ka karabineros nga langitnon? Tuod man, ang ngalan sa duha ka karabineros nga langitnon makahatag ug pasalig. Maoy usa ka mahal ug halangdon nga kaponongan, nga gibuhat aron sa pagtabang kang Bathala sa pakiggubat batok sa mga yawa, ug aron sa pagbantay nga dili hisudlan sa mga dautang butang ug inerrihis nga hunahuna ang baligyaan sa Bag-ong Siyon.
Si Placido mopirma na unta aron lamang mahuman ang ilang panagsulti, kay gadali siya kaayo: ang iyang mga kauban nangadye na sa 0 Thoma, apan mao rag gibutad ang iyang mga dalunggan sa iyang oyoan, ug busa miingon siya:
— Unya na lamang human sa klasi, kay basahon ko kana usa.
— Taas kaayo, nakasabut ka? Ang tuyo niini mao ang pagpapasaka sa usa ka pagpangayo nga supak sa gipangayo sa uban; sa usa ka pulong, usa ka sinulat nga maoy batok sa usa ka pangayo. Nakasabut ka Na? Si Makaraig ug pila ka kauban nangayo nga buksan ang usa ka Akademya sa kinatsila, pangayo nga binuang kaayo . . .
