Sa atubangan ning pangotana nga linakturay ug walayliko liko, sama sa usa ka ultimatum, si Juanito wala na makatubag, ug ang iyang amerikana wala na makasugyot bisan diyutay. Kawang lamang ang iyang amerikana wala pagsinyas kang Placido; si Placido nagduhaduha. Gipahimuslan ni Juanito ang usa ka higayon nga ang magtutoon mitan-aw sa usa ka tinon-an nga gatago sa pagkuha sa iyang sapin, nga huot kaayo kaniya, aron pagtunob sa tiil ni Placido ug pagsulti kaniya:
— Tudloi ako, dali na, tudloi ako . . .
— Maoy kalainan . . . Aray, pagka mananap mo kini, misinggit si Placido ug mitan-aw kang Juanito sa mga matang maligutguton, samtang gihikap ang iyang sapin nga sarol.
Ang magtutoon nakadungog sa singgit, nakakita sa duroha ug nakatag-an dayon sa ilang gibuhat.
— Oy, ikaw, kalag nga mananahi — gipamulongan — dili ikaw ang akong gipangotana, apan kay mahigugma ka man nga moluwas sa uban, amber luwasa ang imong kaugalingon, salva te ipsum, ug husaya kining nagubot.
Si P. Juanito milingkod nga malipayon ug aron sa pagpadayag sa iyang pasalamat, giwalwalan sa dila si Placido. Kini namula sa kaulaw, mitindog ug mihatag pamalibad nga dili hisabtan.
Gitan-aw sa makadyot ni Pari Millon si Placido, sama sa usa ka tawo nga naghinamhinam sa pagtan-aw sa usa ka lamian nga sud-an. Pagkanindot tingali nga pakaulawan kadtong bataa nga ambungan, nga kanunay nga maayog sapot, pinataas ang agtang ug malinaw ug panan-aw! Kadto maoy usa ka buhat sa kalooy, ug mao nga ang maloloy-on nga magtutoob nagabudlay sa tininuod, ug gihimo sa hinay ang pagpangotana:
— Ang basahon nag-ingon nga ang mga samin nga puthaw gihimo sa usa ka mabagang lata kun sa pagsakot ba sa nagkalainlain nga metal, tinuod kun dili?
— Maoy anaa sa basahon, pari . . .
— Liberdixit ergo ita est; dili ikaw makapagarbo sa pagsulti nga labi pang maantigo kay sa basahon . . . Human nag-ingon pa gayud nga ang mga samin nga bildo gihimo sa usa ka tipak nga bildo nga ang duha niya ka nawong hinlo kaayo, pinapitlan ang usa kanila sa usa ka tingga nga tinunaw, nota bene, usa ka tingga nga tinunaw . . . Tinuod kini?
