- 147
“escolastico”, mao usab kamo; sa usa ka pulong, mga ginoo, kami mohilak kon kamo naghilak, mag-antus kon kamo nagantus; magsama ang atong mga alampuanan, ang atong mga Hukmanan, ang mga silot, ug makatarunganon usab nga tagaan kamo namo sa mga katungod nga among gitagamtam ug sa among mga kalipay.
Ug kay wala may misanta kaniya, ang iyang kadasig milabi hangtud nga misulti sa kaugmaon sa Pilipinas.
— Sumala sa akong giingon, mga ginoo, ang banagbanag hadool na; ang Espanya nagbukas sa sidlakan alang sa iyang hinigugmang Pilipinas, ug ang panahon nag-anam ug kabalhin, ug nahibalo ako mga gihimo dinhi labaw pa sa gihunahuna. Kanang Kagamhanan nga matud pa ninyo nagpanuko ug walay kaugalingong kabobot-on, maayo nga atong dasigon pinaagi sa atong pagsalig, nga ipakita nga kita nagpaabut kaniya; pahinumduman ta siya pinaagi sa atong panlihok (kon mahikalimot, butang nga wala pa paabuta) nga kita milaum sa iyang mga maayong tinguha ug nga dili maayong paluba sa laing tinguha, gawas sa paghatag katarungan ug ang kaayuhan sa tanan. Dili mga ginoo, — mipadayon siya sama sa usa nga naghimong pakikigpulong, dili kita angayan mosugot nga ning butanga adunay lain nga pangayoag pakitambag, kay kini nagpaila nga gipasagdan lamang ang tanan; ang inyong gihimo hangtud karon sulondon uyamut, wala kamo maggawig mga hiwing paagi ug wala usab kamo magpanuko; miatubang kamo kaniya sa laktud ug walay kutikuti, ug ang mga katarungan nga inyong gipahayag tul-id kaayo; ang inyong tinguha mao ang pagtabang sa mga magtutoon sa unang mga tuig ug paghatag kasayon sa pagkakato-on sa pila ka gatus ka tinon-an nga nagpuno sa mga klasi ug nga dili maatiman sa usa lamang ka magtutoon. Kon hangtud karon ang inyong gipangayo wala pa kahukmi, walay laing hinungdan kon dili, tungod sa inyong nang hibaloan, nagtiponpon ang mga bulohaton; apan nagpaabut ako nga kamo nakadaug na, ug nga kining pagpatawag ni Makaraig maoy tinguha ang pagpahibalo kaninyo sa pagdaug, ug ugma makita ta nga ang ganti sa atong mga panlimbasug, nga mao ang pagpasalamat sa tibook lungsod, ug kinsay nahibalo, mga ginoo, kon ang Kagamhanan mangayo bag ganti alang kaninyo, tungod sa inyong nabuhat alang sa yutang natawhan!
