262
Ang pagkuyog sa usa ka kotsi, ang paglingkod sa iyang kiliran, paghanggap sa iyang kahumot ug pagpakigsaghid sa iyang sinina nga sida, ug ang pagsud-ong kaniya nga mapalandongon, kiniyugpos ang mga kamut, dinigo sa silaw sa bulan sa Pilipinas nga makahatag katahum sa mga butang nga labing laksot sa kalibutan, mao kadtoy usa ka damgo nga wala paabuta ni Isagani. Pagka-alaut sa mga tawo nga namauli nga naginusara, naglakaw ug mopadaplin inig-agi sa sakyanan.... Niadtong ilang panagsakay sa dalan nga nagsubay sa baybayon, sa dalan sa Sabana, agi sa taytayan sa Espanya, si Isagani walay laing nakita kon dili ang usa da ka pinangko nga maayong pagkasudlay, tinukod sa usa ka maanindot ug lubaylubay nga li-og nga natago sa usa ka sinina nga pinya. Usa ka ariyos nga brilyanti mao rag nagkidhat kaniya gikan sa dalunggang gamay, sama sa usa ka bitoon sa taliwala sa mga maputi nga panganud. Si Isagani nakadungog sama sa usa ka lanog sa halayo nga nangotana kaniya kang Don Tiburcio de Espadana ug sa ngalan ni Juanito Pelaez, apan kadtong tanan mao rag mga binagting sa lingganay mga gikan sa halayong dapit, sama sa mga tingog nga pagaw nga madungog ta una mahinanok.
Tungod sa kalingaw ni Isagani, gibuyag siya nga nahiabut na sila sa plasa Santa Cruz.
