- 299
— Wala ako makasulti sa mga binilanggo, matud pa ni Placido; tingali 30 silang tanan.
— Magbantay kamo, mosulti ang kauban ni Placido, kay matud pa, karong gabii adunay pinutlanay sa ulo.
— Ha, linti, misinggit si Chichoy, nga mao rag nangitag usa ka hinagiban nga iyang ikasukol, apan kay wala man siyay nakita, migamit na lamang sa sopliti.
Ang hepe milingkod. Nagkurog ang iyang paa. Mao rag nakita na niya nga siya gipunggutan sa ulo, ug naghilak na tungod niini sa mahitabo sa iyang banay.
— Ka, matud pa sa eskribiyinti, walay mahitabo. Ang magtatambag sa.... ug mihimo siyag usa ka sinyas nga hisabtan na sa tanan, si.... masakiton.
— Si Simoun.
— Ehem, ehem, ehem ....
Si Placido ug ang tigbuhat sa kohitis nagtinan-away.
— Kon wala lamang siya masakit....
— Maghimog usa ka rebolosyon, matud pa sa tigbuhat sa kohitis, human modagkot sa iyang sigarilyo sa siga sa kinke. Ug, unya, unsay atong himoon?
— Puwes tinuoron na lamang gayud, kay puslan man nga punggutan kita sa ulo....
Tungod kay gihutoy ang platiro wala nay nakadungog sa sumpay sa sulti. Tingali si Chichoy may gisulti nga makalilisang, kay ang iyang nawong nalain man pag-ayo ug mikisdum ang iyang panagway, sama sa usa ka haponanon nga napildi sa sugalan.
— Maayo pa nga miingon kamo nga nagpasakitsakit siya, kay mahadlok nga mogula. Kay kon hikit-an siya....
Human kini niya isulti gihutoy siya, ug napugos sa Paghangyo sa iyang mga gikasulti sa paggula sa gawas.
— Apan, maayo gayud nga kita mangandam, matud pa sa tigbuhat ug kohitis; kay kon kita pugson sa pagpatay kun pagpakamatay....
Gihutoy na usab ang “maestro,” ug gilayon ang iyang mga sakop namauli sa ila sala ang mga martilyo, gawas ug uban pang mga butang nga makasamad, andam sa pagpanalipod kutob sa mahimo sa ilang mga kinabuhi.... Si Placido ug ang tigbuhat sa kohitis namalik sa paggula.
