- 307
Ug nagsugilon sa iyang pagkaayo sa empatso nga gihumod lamang niya ang iyang pusod sa tubig sa binditahan ug ginuntan sa pagpangadye sa Sanctus Deus, nagatudlo sa mga namati sa tambal nga maayo, kon mobatig kalibag dugo kun butod ba sa tiyan, kun modangat ba ang kamatay, ugaling kay ang nakalain kay ang maong pangadye kon gamiton nga tambal, pangadyeon man sa kinatsila.
— Kining tambala makaayo gayud, apan kinahanglan nga pahiran sa bendita ang dapit nga masakit, — nagkanayon siya. Apan daghan ang mga tawo nga wala motoo ning mga sultiha ug wala usab mag-isip nga hampak ni Bathala kadtong pagkabilanggo ni Basilio. Wala usay manoo nga nahiapil siya sa kagubot, ug usa sa nagsulat sa paskin, kay hiilhan na man kaayo ang iyang kamahinayon ug kabuot, ug maoy gituhoan nga hinungdan niadtong hitaboa ang mga panimalus sa mga prayle, tungod sa paglukat kang Juli, ang anak sa usa ka tulisan nga dakung kaaway sa usa ka makagagahum nga kaponugan.
Ug tungod kay naila na man ang mahugawng pamatasan sa kaponongan ug hinumduman ang mga tibalawan nga panimalus, ang maong katahap maoy gituhoan nga labing hadool sa katin-awan ug labaw nga pasikaran.
— Maayo ra gayud nga gipapahawa ko sa akong balayl, nagkanayon si “hermana” Penchang. Dili ako buot nga hikasuk-an ako ug kasilagan sa mga prayle, ug maoy hinungdan nga giapil ko gayud sa pagpangitag salapi.
— Apan ang tinuod mao nga siya nasubo kaayo nga nahibulag si Juli, kay si Juli nangadye ug nagpuasa man tungod kaniya, ug kon nadugaydugay pa tingali, hangtud mao na lamay papangadyeon sa mga penitensiya nga gihatag kaniya sa pari kon mokompisal siya. Kay ngano man? Kon ang mga pari makapangalili sa pag-ampo kanato ug siHesukristo nagpakamatay tungod sa atong mga sala, dili ba usab makahimo sa pagpangalili si Juli kang “Hermana” Penchang?
