- L’Espagne et sa vetur,
- L’Espagne et sa grandeur
- Tout s’en en!
- VICTOR HUGO
Ang mga mantalaan sa Manila nangaligaw sa pag-asoy sa usa ka bantugang buno nga nahitabo sa Oropa, sa mga pagdalayeg ug mga pag-ulo-ulo sa pila ka mga mangwawali sa siyudad sa maayong pagdula sa operatang pransiyanhon, nga lugos gani makasulat aron sa paghisgot sa mga binuang nga ginahimo sa lalawigan sa usa ka panon sa mga tulisan ng gipangulohan sa usa ka pangulo nga makalilisang nga ginganlan si Matanglawin. Apan kon mao na gani ang tulisan ang usa ka kombento kon ang usa ba ka katsila, manungha dayon ang tag-as nga sinulat nga magsaysay sa mga makalilisang kaagi ug mangayo sa pagpakanaug sa JUEZ DE CUCHILLO, ug sa mga makapatagam nga paagi ug uban pa. Ug maoy hinungdan nga wala makahisgot sa nahitabo sa lungsod sa Tiani, bisan na lamang usa sa pasumbingay kun usa ka dungogdungog. Sa mga pundok sa dili mga sakop sa Kagamhanan, may hungihong nga diyutay apan ang tanan lubog kaayo ug walay katin-awan, nga wala gani ipahibalo ang ngalan sa gidaugdaug, ug ang mga pahayag nga nagpaila sa ilang tinguha nga masusi kadtong hitaboa. Mao ray hibaw-an sa tinonga si Pari Camorra mipahawa sa lungsod aron sa pagbalhin sa lain human ang pila ka adlaw nga pagpuyo sa ilang kombento sa Manila.
— Intawon si Pari Camorra, — nanghupaw si Ben Zayb nga nagpakamaloloy-on — labon malipayon siya kaayo maayog kasingkasing!
Matuod nga ang mga estudyante nakakaplag sa ilang kagawasan gumikan sa panlimbasug sa ilang mga ginikanan, nga
