Sa diha na siya sa dalan, si Basilio naghunahuna kon unsay iyang buhaton sa dili pa mudangat ang makalilisang takna, kay ika-7 pa man lamang. Nahiatol kadto nga maoy panahon sa mga paglinghayaw sa mga tinun-an ug kini silang tanan diha sa tagsatagsa nila ka mga lungsod. Si Isagani mao day bugtong nga wala mopauli, apan nawala lang sukad pa niadtong buntaga ug wala hibaw-i ang iyang gidangatan. Kini gisugilon kaniya kang Basilio, nga sa paggula niya sa bilanggoan miduaw siya sa iyang higala aron pagpangilyupo nga papuy-on unta siya sa iyang balay. Si Basilio wala masayod kon asa siya muadto, wala siyay salapi, wala gayud siyay nahot gawas sa iyang rebolber. Ang handumanan sa lamparahan maoy anaa sa iyang hunahuna, sulod sa duha ka takna mahitabo na ang dakung kadaot ug, sa paghunahuna lamang kaniya, ingon ug ang mga tawo nga nanglabang sa atubangan sa iyang mga mata, nanglabay nga mga walay ulo; misantop kaniya ang yawan-ong kalipay sa paghunahuna nga bisan siya tuod gutom, niadtong gabhiona mamahimo siyang kahadlokan, nga gikan sa pagkakabos nga tinun-an ug sulogoon, ang adlaw magasud-ong kaniya nga makalilisang ug makahadlok, magbarog sa imabaw sa tipun-og sa mga minatay, nga magpakanaog mga balaod alang niadtong tanang nanglabay sa atubangan sulod sa ilang mga matahum nga salakyanan. Mikatawa siya ingon sa usa ka sinilutan sa Espidno, ug dayon niyang hikap sa pu-on sa iyang rebolber; ang mga sudlanan sa bala didto sa iyang mga bolsa.
Nakapangutana siya sa iyang kaugalingon, asa man kaha magsugod ang kaguliyang? Tungod sa iyang kalisang, wala siya makapangutana niini kang Simoun, apan si Simoun nagingon kaniya nga mupahilayo siya sa dalan Anloague.
Sa ingon niana nakahunahuna siya; niadtong hapona, sa
