- 337
pagpig-it sa kamot kun maghulat ba lang siya nga ang Heneral maoy mouna pagdunol sa iyang kamot? Kayati! Ngano gayod siya nga wa mahinumdom ning butanga aron unta pagpakitambag sa iyang dakong higala nga si Simoun? Aron pagtago sa iyang pangilogkilog nangutana siya sa hinay nga tingog ug pagaw sa iyang anak:
— Nag-andam ka bag usa ka pakigpulong?
— Wala na maurog karon ang mga pakigpulong, labi na niining higayona!
Nahiabot si Jupiter kuyog kang Juno, ug kini nahimo ingon sa usa ka kastilyo nga nagpangidlap sa mga kalayo nga binuhat: mga brilyante ang gidayandayan sa iyang mga buhok, mga brilyante ang diha sa liog, sa mga bukton, sa duha niya ka mga abaga, sa tanang dapit! Nagpasundayag sa usa ka matahom sinina nga seda, nga hataas kaayog ikog, binuldahan sa mga bulak nga lutaw uyamot.
Ang Heneral misaka sa balay sama sa iyang kaugalingon, kay mao may gihangyo nga nagkanguhal na Don Timoteo. Ang orkesta mitugtog sa “marcha real,” ug ang langitnong magtiayon misaka nga maugdang kaayo sa inalpombrahan nga hagdan.
Ang kaugdang sa Iyang Kamahalan dili tinun-an; tingali nga kadto maoy una, sukad sa iyang pag-abot sa Kapupodan, nga gibati siyag kasubo; adunay diyutay nga kasubo nagatukaw sa iyang mga panghunahuna. Kadto maoy katapusan niyang pagdaog sa iyang tutolo ka tuig nga pagkahari, ug sulod sa duha ka adlaw, hangtod sa hangtod ikanaog na siya niadtong kahitas-an nga labihan. Unsay gibilin niya sa iyang luyo? Sa Iyang Kamahalan wala gayod ilingi ang iyang ulo ug iyang gipalabi ang pagtan-aw ngadto sa atubang, ngadto sa umaabot! Matuod makadala siyag katigayonan, daghang salapi gipatipigan sa mga Bangko sa Oropa nagahulat kaniya, aduna siyay mga otel, apan siya nakahimog kadaot sa kadaghanan, aduna siyay daghang mga kaaway sa kagamhanan didto, ang hataas, ang hataas nga punoan nagahulat kaniya sa labing madali ug nga karon nangahapay na usab. Nganong dili pa man siya pabilin ug dugay ingon sa gitambag kaniya ni Simoun? Dili, ang kaulawan maoy una sa tanan. Ang mga pagyukbo kapin pa, dili na kaayo mabination ingon kaniadto; iyang hipanid-an mga tinan-awan nga dili na kaayo makanunayon, ug hangtod di na
