- 361
Tutolo ka mga sundalo miluthang apan ang tawo nagpadayon sa iyang pagbarog; misulti nga nagsiyagit apan wala siya hisabti.
Ang Carolino mihunong, ingon sa nakaila niadtong baroga nga nadigo sa kahayag sa Adlaw. Apan ang kabo naghulga kaniya sa pagpusil kon dili kadto niya luthangon. Ang Caro lino mitunong ug mabati ang usa ka buto. Ang tawo nga nagbarog sa pangpang mikonti ug nawagtang nga nagtiyabaw nga nakapalipong sa Carolino.
Nagubot ang kalibunan ingon sa nagkaguliyag panagan ang nanagpasalipod kaniya. Ang mga sundalo sa ingon niana nanagpanasdas gilayon, gawas na sa tanang pagsukol. Laing tawo mibutho sa imabaw sa pangpang nagwarawara sa usa ka bangkaw; giluthang sa mga sundalo, ug ang tawo napiko sa hinayhinay, migunit sa usa ka sanga sa kahoy; giluthang pagusab, ug napukan dihadiha sa imabaw sa pangpang.
Ang mga sundalo nangatkat sa labihan ka abtik, gipanaod ang mga bayoneta sa ilang pusil, andam sa usa ka bugno nga linawasay; ang Carolino mao da ang bugtong nga naglakaw sa dakong kataspok, sa panan-aw nga nagaliraw, masulob-on, naghunahuna sa siyagit niadtong tawo sa iyang pagkalusno pinukan sa bala sa iyang pusil. Ang unang nakadangat ngadto sa imabaw nakahiabot sa usa ka tigulang nga himalatyon, nagbuyod sa imabaw sa pangpang; iyang gidugsak sa bayoneta ang lawas, apan ang tigulang wala mamilok; ang tinan-awan didto itutok sa Carolino, usa ka tinan-awan nga dili ikag-asoy ug sa usa ka bukogong kamot nagtudlo kaniya ug usa ka butang didto sa luyo sa mga pangpang.
Ang mga sundalo nanglingi ug nakakita sa Carolino nga nanluspad pag-ayo, ang ba-ba nagnganga ug sa usa ka panan-aw nga naglutaw ang katapusang kinidlap sa iyang salabutan. Ang Carolino nga dili lain kon dili si Tano, ang anak ni Kabesang Tales, nga nahiuli gikan sa Carolina, nakaila sa himatyon nga ang iya diayng apuhan, si Tandang Selo, nga, tungod kay dili na mahimo kaniya pagsulti, miingon kaniya pinaagi sa nagtinga nang mga mata sa usa ka kaagi nga puno nga puno sa kasakitan. Ug hangtud sa patay na, kanunay gihapong nagtudlo sa usa ka butang luyo sa mga pangpang...
