Asin huli ta pinagsasabi na an pagkabilanggong ito gikan sa panghimalos dahel saiya asin sa saíyang amá, su kamondoan kan daraga nakasampot sa pagkawarai nin pagsárig. Ngunyan nánongod na man saiya an pagligtas saiya, siring kan ginibo saiya kan balukaton sya sa pangagurangnan, asin sarong tingog sa irárom nagsasadol saiya kan pakiran asin iinaatúbang sa saiyang bandingan an sarong makagigíram na bolong. “Si Padre Camorra, su cura!” an sabi kan tingog. Kinákagat ni Julí su saíyang ngábil asin nagdadánay sa mamondong paghorophórop. Huli kan crimen kan saíyang amá, binilanggó su saíyang apó sa pagláom na sa síring na palakaw mátunga su akí. Daing ibang makakapalibre saiya kundí si Padre Camorra, asin si Padre Camorra nagpahiling na dai sya napupuwasan na gayo nin mga tataramon sa paggiromdom sa útang na boot asin sa saiyang ugáleng katapatan naghágad nin pagpakasákit. . . Magpoón kaito naglilikay na si Julí na makasompong saiya, alágad pinapaghadok sya kan cura sa saíyang kamot, pinipildit an saíyang dongó, an saíyang pisngi, pinagsusubahan sya nin mga sobang may kaibang mga kiyat asin nagngingisi, nagngingisi na nagkokodot saiya. Si Juli an dahelán kan hampak, na ginámit kan marhay na cura sa nagkapirang hagbayon na nagrilibot sa barrio na pinagtogtogan su mga daraga. Su mga malicioso pagkahiling saiyang naglabay pormal asin dokó, nagtararom sa tingog na mangyáring madángog nya: “Kun muya ako, maiindultuhan si Cabésang Tales!” Su daraga mináabot sa saindang harong mamondó asin dai namumugtak su mga mata. Naliwat na marhay si Julí; nawará su saiyang gayagaya, dai nin nakakita saíyang nakahoyom, pahangá na magtaram asin garo nganí takot na maghiling kan saiya mansanang lawog. Sarong aldaw nakita sya sa banwa na may dakúlang óring sa ángog, sya na paráting maglakaw na mahusay an panggubingan asin sarong baldit naghapot ki Hermánang Balí kun baga an mga mináhogot nahohólog sa gagamban. “Segúrong seguro!” an simbag kan babaye asin isinaladawan saiya su sito na baga haléna dumán. Huli kan pagkabilanggó, an mga masípag asin mga
