mapasinalámat na mga kadudugó nangagholaw na magpapakasákit sinda tangáning makalda su hagbayon; alágad nin huli ta sinda gabós dai nakatipon nin tolong pólong pisos, si Hermánang Bali síring sa giráray, nagkaigwa nin orog karahay na kaisipan. “An súkat nyátong gibohon makihumápot sa escribiente,” an sabi. Sa mga makauugay na itong mga tawo, su escribiente sa tribunal iyo su oráculo sa Delfos sa mga griego kan mga énot na panahón. “Kun taohan mo nin sikápat asin tabakó,” an sabi pa, “isasabi saimo an gabós na katogonan na mabotog an saímong payo sa kadadangog saiya. Kun igwa kang pisos, ililigtas ka dawá na sa bitís ka na kan bitayán. Kan ilaog sa bilanggoan si Simon na sakong kanátad asin pinagparahampak, huli ta dai nakapagpaháyag dapit sa paghab-on na nangyari sa harani kan saíyang harong, abaa! sa duwang sikápat may kabangá asin sarong rolyong báwang, kinalda ito kan escribiente. Asin náhiling ko si Simón na pahángang makalakaw asin napiritan na maghigdá sa laog nin dai nagkúlang sa sambulan. Ay! nalapá su saíyang itukaw, abaa! iyong saíyang ikinagadán!” Inakó su hátol ni Hermánang Balí asin sya mansana an nangákong makikiólay sa escribiente; tinaohan sya ni Julí nin apat na sikápat (388) asin may idinúgang na mga tápang usa na inayaman kan apó. Si Tandang Selo nangangayam na namán. Alágad daing nahímong anó man su escribiente: su bilanggó nasa Manilá asin dumán dai minálambat an saíyang kapangyarihan. Talastas na gayo kan escribiente na su saíyang ka pangyarihan dai minálampas sa sagkod kan Tiani, alágad kaipuhan na naingatan nya an saiyang marhay na dangog asin máwalat saiya su tápang usa. “Alágad, matataohan ko kamo nin sa madónong na hátol asin iyo na magiba kamo kasi Juli sa Pangkatiwasayan na Hokom. Kaipuhan na omiba si Julí.” Su Panglalawigan na Hokom sarong táwong daing isusugad, alágad kun makita si Julí sakalé mapahiling nin marhay na pakigugalé: uya digdi an kadonongan kan hátol. Sa makúring grabedad dinangog kan Ginoóong Hokom si Hermánang Balí, na iyong nagtataram, pigtataga
