This page has been proofread.
Il «viv' Adina« fo la rouda
Ed il brügir nun ho pü fin;
La fantasia da tuots as s-choda;
Effect famus del ferm, bun vin.
E gö e chaunt e la bavranda
Nun haun pü fin nel rich chasté
E stravizieda ais la banda;
Ho fö arsaint aint nel tschervé.
E l'alb' intaunt dad our glüschiva,
Serenited in cour portand;
Il ferm chastlaun intaunt dormiva,
Suot maisa stais sco mort gigant.
III.
In chesa da Adam.
Dasper San Güerg ils cavaliers faun posa
E pittoresc ais lur acchampamaint.
Aint nel sanctuari d'ogni sencha chosa
Chattettan els bavranda, alimaint;
Els tuornan uossa a lur ferms chastels,
Containts dels dis passos serains e bels.
