Page:Fluors alpinas.djvu/126

— Nun tmair, ma figlia, orma mia diletta;
Tü saung, tü vita da quaist pover cour;
Tü turnerost bain bod in ta chesetta!
Sarost l'algrezcha da quaist pover cour!
Per liberer la val dal nosch dragun,
Stoust gnir cun me sün Guardaval dalun!

E la figlietta obedit. Orneda
Sco üna spusa cun sieu bap la vo
Sün Guardaval. Intaunt in la valleda
Il vegl avaiva tuot per bain pino,
Spedind ün pot a pü d'ün cher amih
D'as rechatter a Madolain quel di.

A Madolain il bap, sa brava figlia
Sun arrivos e püs amihs sun lo;
Uschea dschet il vegl: — hoz la famiglia
Engiadinaisa libra eau faro!
Schi, Dieu s'allegra! Gè lo som il god,
Eau's clamero sunand il corn sül ot. —

— Nun tmair ma figlia, orma mia diletta,
Eau sun cun te, sün Guardaval bain bod.
O guard' il rich Signur lossü chi spetta
Davaunt la porta da sieu gnieu da frod.
El ans ho vis, el voul ans inscuntrer .....
Pü fazil po'l suot mieu curtè cruder! —